92 milyon dollara alınan klub minimum 800 milyon dollara satılacaq

Milli Hokkey Liqasında (NHL) mübarizə aparan “Ottava Senators” klubunun satışı tezliklə reallaşacaq.

Futbolxeber.az saytının xarici KİV-ə istinadən verdiyi məlumata görə, artıq mümkün satışın detalları da məlumdur.

İnsayder Kris Conston bildirib ki, satışın yekun məbləği 800 milyon dollardan çox olacaq.

Daha öncə NHL-in komissiya agenti Qəri Bettmen bildirmişdi ki, “Ottava Senators”un minimum 15 mümkün alıcısı var. Kluba sahib olmaq istəyənlər arasında tanınmış aktyor Rayan Reynolds da var. O, digər investorlarla birgə kluba yiyələnmək arzusundadır.

Qeyd edək ki, 2003-cü ildə “Ottava Senators”u səhmlərinə sahib çıxan Yudjin Melnik ötən il vəfat edib. O, Kanada klubu üçün 92 milyon dollar ödəmişdi. Melnikin vəfatından sonra kluba sahiblik onun qızları Anne və Oliviyaya keçib. Onlar isə bir müddət əvvəl klubu satışa çıxarıblar.