Abdul-Cabbar 34 illik rekordunun yenilməsinə belə münasibət bildirdi

NBA-nın əfsanəvi basketbolçularından olan Kərim Abdul-Cabbar 34 illik rekordunun Lebron Ceyms tərəfindən yenilənməsinə münasibət bildirib.

Futbolxeber.az saytının məlumatına görə, ötən gecə “Okohamo” ilə oyunun üçüncü hissəsində “Los Anceles Leykers”in üzvü Lebron Ceyms karyerası ərzində topladığı xalların ümumi sayını 38388-ə çatdırmaqla NBA tarixinin ən məhsuldar basketbolçusu olub.

Karyerası ərzində 38387 xal toplayan Kərim Abdul-Cabbar 34 illik rekordun qırılmasına görə təəssüflənmədiyini qeyd edib:

“Həmin rekord atışı zamanı nələr hiss edəcəyim barədə o qədər çox yazıldı ki... Mən bəzən yazılanları oxuduqca özümü gülməkdən çətinliklə saxlayırdım. Daha əvvəl də bu barədə danışmışam. Burada ümumiyyətlə müzakirə olunası heç nə yoxdur.

Sanki mən lotoreyada 1 milyard dollar udmuşam, 34 ildən sonra kimsə 2 milyard dollar udur və məndən nə hiss etdiyimi soruşurlar. Təbii ki, öz uduşuma görə də, növbəti şəxsin uduşuna görə də sevinərəm. Bir nəfərin uğuru heç vaxt başqa birinin uğuruna kölgə sala bilməz”.