Sabiq dünya çempionu qarşıdakı döyüşündən danışdı

Ağır çəkili peşəkar boksçular arasında sabiq dünya çempionu Entoni Coşua amerikalı Cermeyn Franklinə qarşı keçirəcəyi növbəti döyüşündən danışıb.

Futbolxeber.az saytının xarici KİV-ə istinadən verdiyi məlumata görə, britaniyalı boksçu döyüşü səbirsizliklə gözlədiyini qeyd edib:

“Rinqə qayıtmaq üçün səbirsizlənirəm. Aprelin 1-də baş tutacaq döyüşü böyük maraqla gözləyirəm. Fiziki baxımından görüşə tam hazıram. Rinqdə şou göstərmək və yeni məşqçimdə (Derrik Ceyms nəzərdə tutulur)  xoş təəssüratlar yaratmaq istəyirəm. Onun standartları çox yüksəkdir”.

33 yaşlı idmançı rəqibi haqda da söz açıb: “Franklin çox ciddi rəqibdir. Onun döyüş tərzi əladır. Bunu əvvəlki döyüşlərində nümayiş etdirib. Bilirəm ki, o da qarşıdakı görüşümüzü həvəslə gözləyir”.

Xatırladaq ki, Coşua peşəkar rinqdə keçirdiyi 27 döyüşdən 24-də qələbə qazanıb. Bu qələbələrin 22-nə o, nokautla nail olub.

Əlavə edək ki, Coşua ilə Franklin arasındakı döyüş aprelin 1-də Londondakı “O2 Arena”da baş tutacaq.