Ferstappen: “Yeni mövsümdə əsas rəqibimiz “Mersedes” olacaq”

“Redd Bull” pilotu Maks Ferstappen “Formula-1”in yeni mövsümü ilə bağlı fikirlərini açıqlayıb.

Futbolxeber.az saytının xarici KİV-ə istinadən verdiyi məlumata görə, niderlandlı dünya çempionu bildirib ki, onun əsas rəqibi “Mersedes”in üzvləri olacaq:

“Ferrari” ilə müqayisədə “Mersedes”in son illərdəki nəticələri daha yaxşıdır. Əgər onlar ötən mövsümkü problemlərini aradan qaldıra bilsələr, əsas rəqibimiz olacaqlar. Ötən mövsümün gedişində “Mersedes”in pilotları bəzən maksimum güclərini göstərməyi bacarırdılar. Bəzən isə bu, onlarda alınmırdı. Odur ki, indidən rəqibin durumu barədə geniş fikir bildirə bilmərəm. Yalnız onu deyim ki, son illər “Mersedes” dəfələrlə çox güclü olduğunu nümayiş etdirib. Onların çox yaxşı kollektivi var. Təbii ki, bütün bunlarla yanaşı, “Ferrari”ni də hesabdan silmək olmaz. O ki qaldı bizə, komandamıza inanıram. Düşünürəm ki, biz ortaya çox yaxşı iş qoya biləcəyik”.

Xatırladaq ki, 2015-ci ildə Abu-Dabi Qran Prisində “Formula-1”də debüt edən Ferstappen son 2 ilin dünya çempionudur.

Əlavə edək ki, “Formula-1” üzrə 74-cü dünya çempionatı martın 5-də Bəhreyndə start götürəcək. 23 mərhələdən ibarət yarışa noyabrın 26-da Abu-Dabidə yekun vurulacaq. Dünya çempionatının 4-cü mərhələsi olan Bakı Qran Prisi isə aprelin 30-da keçiriləcək.