Hikaru Nakamura: "Şəhriyar Məmmədyarov iti düşüncəlidir"

"Olduqca xoşbəxtəm. Səhv etmirəmsə, 4 aydan sonra ilk dəfədir ki, 1/4 finalda qələbə qazandım".

Futbolxeber.az saytının məlumatına görə, bu fikirləri Çempionlar Turunun "New In Chess" adlı V raundunun yarımfinal mərhələsində Şəhriyar Məmmədyarova rəqib olan ABŞ şahmatçısı Hikaru Nakamura yarışın rəsmi saytına açıqlamasında deyib.

34 yaşlı qrossmeyster uzun müddətdən sonra yarımfinala vəsiqə qazandığını vurğulayıb. O, Məmmədyarovla deulin çox həyacanlı olacağını söyləyib: "Şəhriyar taktiki baxımdan həddindən artıq iti düşüncəlidir. 1/4 final mərhələsində layiqli qələbə qazanıb".

Məmmədyarov isə qələbə təəssüratlarını qısaca bölüşüb: "Çempionlar Turunda ilk dəfə yarımfinala vəsiqə qazandım. Təbii ki, bu, yaxşı nəticədir".

Qeyd edək ki, yarımfinal mərhələsinin ilk qarşılaşmaları bu gün keçiriləcək ("Report").