“Qələbəyə Azərbaycan millisindən daha çox layiq idik”

Futzal üzrə Moldova yığmasının baş məşqçisi Vladimir Vusatıy Kişinyovda keçirilən beynılxalq turnirin finalında Azərbaycan yığmasını məğlub etdikləri oyun haqda danışıb. Futbolxeber.az-ın moldfootball.com-a istinadən verdiyi məlumata görə, Vusatıy  komandasının qələbəyə layiq olduğunu bildirib: “Turnirdə iştirak edən komandaların səviyyəsi elə də aşağı deyildi. Azərbaycan millisinə qarşı oynamaq çətin idi. Çünki rəqib texniki cəhətdən üstündü. Lakin biz taktiki cəhətdən düzgün oynamağa çalışdıq. Rəqibin fərdi keyfiyyətlərindən yararlanmasına imkan vermədik. Oyun istədiyimiz kimi alındı. Yalnız sonda heç nədən qol buraxdıq. Fikrimcə, qələbəyə rəqibdən daha çox layiq idik. Xüsusən də ikinci yarıda. Fiziki baxımdan da rəqibi qabaqladıq. Qolla nəticələnməli olan şanslarımız vardı”.