Orxan Məmmədov: “Dövlət dəstəyi olmadan bu qələbə mümkün deyildi”

Azərbaycan Minifutbol Federasiyasının prezidenti Orxan Məmmədovun Futbolxeber.az saytına müsahibəsi

- Finalda Macarıstanı məğlub edən (4:2) minifutbol millimiz Bakıda keçirilən dünya çempionatının qalibi oldu. Milli komandamızın çempionluğunu necə şərh edərdiniz?

- Bu, Azərbaycan minifutbolu üçün tarixi hadisədir. Turnir boyu milimizi dəstəkləyən hər bir azarkeşə minnətdaram. Azərbaycan dövlətinin Prezidentinə, hökumətinə təşəkkür edirəm ki, bizim üçün belə şərait yaradıblar. Əlbəttə ki, dövləti dəstəyi olmadan bu qələbə mümkün deyildi. Futbolçulara, məşqçi heyətinə minnətdaram. Onlar bu dünya çempionatında demək olar ki, səhvsiz çıxış etdilər. İnanırıq ki, bu çempionluq bizi daha böyük qələbələrə aparacaq. Dünya kubokunun məhz Bakıda, öz azarkeşlərimiz önündə qazanılması bizim üçün əlavə gücdür.

- Çempionluqdan dərhal sonra ABŞ səfirliyi millimizi təbrik etdi. Bu, milli komandamızın çempionluğunun miqyasının böyüklüyünü göstərirmi?

- Bizim qələbəmiz çox böyükdür. Bu, danılmaz bir faktdır. Dünya çemponatında zəiflər olmur. Biz hələ Avropa çempionu olarkən cənab Prezident bizi qəbul etmişdi, dəstək olmuşdu, maliyyə dəstəyi göstərmişdi. Bu gün qazanılan çempionluqda bütün bunların payı var.

- Demək olar ki, minifutbolda əsas hədəfə çatdınız?

- Cavan federasiyayıq. Ona görə də hədəflərimiz çoxdur. Minifutbolu başqa səviyyəyə çatdırmaq istəyirik. Uşaqların, gənclərin minifutbola cəlb olunması hədəflərimizdən biridir.

- Bir müddətdir ki, minifutbol federasiyası üçün stadion tikilməsi məsələsi müzakirə edilir. Dünya çempionluğu arenanın inşasını tezləşdirə bilər?

- Əlbəttə. Biz buna inanırıq.

- Yüksək səviyyəli təşkilatçılıqdan sonra minifutbolun FİFA tərəfindən qəbul olunması nə dərəcədə mümkündür?

- Biz çalışacağıq ki, qəbul olunsun. Dünya Minifutbol Federasiyasının rəhbərliyi ilə də bu məsələni müzakirə edirik.  

İbrahim Cəfərov