“Penaltilər seriyasından öncə baş məşqçimizdən “şirinlik” istəsəm də, məni “fırlatdı”

“Matçın gedişində məğlub durumda olsaq da, möhtəşəm azarkeş dəstəyinin qarşısında heç bir gərginlik olmur. Əla azarkeş dəstəyimiz var idi. Biz də sona qədər inanırdıq. Çox şükür ki, istəyimizə çatdıq. Qələbə ilə azarkeşlərimizi sevindirdik və dünya çempionatında 1/4 finala yüksəldik”.

Futbolxeber.az saytına müsahibəsində bu sözləri minifutbol üzrə mili komandamızın qapıçısı Vəli Qafarov dünya çempionatının 1/8 finalında penaltilər seriyasında Rumıniyanı məğlub etdikləri oyun barədə danışarkən deyib.

Təcrübəli qolkiper bildirib ki, penaltilər seriyasından öncə baş məşqçi Elşad Quliyevdən “şirinlik” almaq istəyib: “Amma o da təcrübəli biri olaraq məni “fırlatdı”. Nəyəsə söz vermədi (gülür). Heç nə olmaz”.

Qafarov millimizin dünya çempionu olmaq şansını belə dəyərləndirib: “Son dünya çempionunu məğlub etmişiksə,

favoritlər arasındaydıq. Şübhəsiz ki, rumınları məğlub etməklə çempionluq şansımız daha da artdı. Lakin tələsmək olmaz. Növbəti oyuna hazırlaşmalıyıq”.

O, sabah mundialın 1/4 finalında İngiltərəyə qarşı keçirəcəkləri matçdan da söz açıb: “Təbii ki, hazırlaşacağıq. Məşqçilərimiz rəqibin oyun tərzini analizlər edəcəklər. İngilislərlə matçda da uğurlu nəticə qazanmaq istəyirik”.

Millimizin qapıçısı azarkeşlərə də səslənib: “Azarkeşlərimizin bizə İngiltərə ilə matçda da möhtəşəm dəstək olacaqlarına inanıram. Əlbəttə ki, biz də onları sevindirmək üçün əlimizdən gələni edəcəyik”.