Millimizin baş məşqçisi: “Avropa çempionu olanda da rumınları məğlub etmişdik”

“İlk növbədə xalqımızı təbrik edirəm. Bizə sona qədər dəstək olan azarkeşlərə minnətdaram”.

Futbolxeber.az saytının məlumatına görə, bu sözləri minifutbol üzrə milli komandamızın baş məşqçisi Elşad Quliyev deyib.

O, Azərbaycan yığmasının Bakıda keçirilən dünya çempionatının 1/8 finalında Rumıniyanı mübarizədən kənarlaşdırmasını belə şərh edib: “Ağır oyun idi. Bizim üçün çox çətin oldu. Bundan sonrakı matçlar da asan olmayacaq. Çempion olmaq istəyiriksə, bu çətinliklərin öhdəsindən gəlməliyik”.

O, rumınlarla matçın erkən final adlandırılması fikri ilə razılaşıb: “Rumıniya çox güclü rəqibdir. Onları məğlub etmək bizim üçün hər zaman xoşdur. Avropa çempionu olanda da rumınları məğlub etmişdik. Rumıniya üzərində qələbə bizim üçün əlavə motivasiya olacaq”.

Mütəxəssis növbəti rəqib haqda da fikirlərini bölüşüb: “1/4 finalda İngiltərəyə qarşı bizi daha çətin yun gözləyir. Artıq sabahdan həmin matça hazırlaşacağıq. İngilislərin Portuqaliya ilə oyununu izləməmişəm. Bu gecə həmin matça baxacağam”.

E.Quliyev sərəncamında olan hər iki qapıçıya güvəndiyini vurğulayıb: “Ağaseyid keçən oyun çox yaxşı dayanmışdı. İlk hissədə də pis deyildi. Vəli Qafarov da peşəkar qapıçıdır. Bu gün möhtəşəm dayandı. Oyunçular arasında güc bölünməlidir”.