Evdə də qonaq “İmişli” - YAZI

Bu, Kaşukun “İmişli” ilə görüşdə hesabı açdığı epizoddur. Fikir verin, “Qarabağ” fərqləndikdən sonra qapının arxasındakı topdaşıyan uşaqlar qola sevinirlər. Halbuki Ağdam klubu bu matçda qonaqdır. Nominal ev sahibi “İmişli”dir. Adətən topdaşıyan komanda ev sahibi klubun aşağı yaş qrupları üzrə komandalarından seçilir. Tutaq ki, “Qəbələ” öz meydanında “Kəpəz”i qəbul edirsə, bu matçda topdaşıyan uşaqlar “Qəbələ”nin U-13, yaxud U-15 komandasının üzvləri olur. Nəzərə alsaq ki, “İmişli”nin “nə goru var, nə də kəfəni”, o zaman ehtimal etmək olar ki, bu azyaşlıların “İmişli”yə heç bir aidiyyəti yoxdur. Böyük ehtimalla, Yevlaxda futbolla məşğul olan azyaşlılardır.

Yaxşı xatırlayıram, elə həmin “Qarabağ”ı “İmişli” keçən il Qubada qəbul edirdi. Ev sahibi “İmişli” olsa da, stadiona toplaşanların 95 faizi “Qarabağ”a azarkeşlik edirdi. Bəli, Ağdam klubu son illər qazandığı nəticələrlə milyonların könlündə taxt qurub. Bu gün “Qarabağ”a Qubada da azarkeşlik edirlər, Yevlaxda da, Tovuzda da, Gəncədə də, Lənkəranda da. Lakin “Qarabağ” Yevlaxa səfər edib “Karvan”la, yaxud Tovuzda “Turan Tovuz”la, Gəncədə “Kəpəz”lə qarşılaşırsa, heç bir halda “Qarabağ”a dəstək olanların sayı yerli komandanın fanatlarından çox olmur. “İmişli”nin bədbəxliyi bax bundadır. Komanda doğma məkana qayıtmadıqca, bir gün Qubada, sabahısı gün Şamaxıda, birsigün də Yevlaxda oynadıqca, hər zaman məhz belə - evində qonaq olacaq. AFFA 66 günə Hövsanda 10 stadion inşa elədi, amma “İmişli” 3 ildən çoxdur stadion məsələsini həll edə bilmir. Guya kluba Premyer Liqaya yüksələndə 1 illik möhlət verilmişdi. Nə oldu bəs? 1 ildən də çox keçib, amma dəyişən nəsə yoxdur. Özünü yeni nəsil klub idarəçisi adlandıran “İmişli” rəhbərliyinə bu barədə sual ünvanlasan, deyəcəklər ki, sabah torpaq məsələsini həll edirik, 2 gün sonra fundament atılır, 5 günə özünüz də görəcəksiniz... Yonca məsələsi...

Biz deyəndə ki, “İmişli”, “Şəfa” kimi klubları Premyer Liqaya buraxmaq olmaz, bizə düşmən gözü ilə baxırlar. Hər dəfə söhbət “İmişli”dən düşəndə sual olunur ki, “3-4 ildə bu klubun Azərbaycan futboluna hansı faydası dəyib?”, cavab verən olmur. Çünki cavab yoxdur! Sadəcə adamın “İmişli”, “Şəfa” kimi klublara dövlət tərəfindən ayrılan milyonlara heyfi gəlir...

Az əvvəl xəbər yayıldı ki, “İmişli” baş məşqçi Fərid Namazovu istefaya göndərib. Tezliklə xəbər çıxsa ki, Jorj Kaşkilya geri qayıdır, qəti təəccüblənməyin...

İBRAHİM