"1/4 finalda Azərbaycan, yaxud Rumıniya ilə qarşılaşmağın fərqi yoxdur”

“Bolqarıstan çox güclü rəqibdir. Onlar da, biz də qalib gəlmək istəyirdik. Qələbəyə yaxın olsaq da, sonda qapımızda qol gördük. Bununla belə, penaltilər seriyasında qələbə qazandıq və buna görə çox sevinirik”.

Futbolxeber.az saytına açıqlamasında bu sözləri Bakıda keçirilən minifutbol üzrə dünya çempionatında ilk 1/4 finalçı olan İngiltərə millisinin baş məşqçisi Cable Ross deyib.

Britaniyalılar növbəti mərhələdə bu gün keçiriləcək Azərbaycan - Rumıniya cütünün qalibi ilə üz-üzə gələcək.

İngilis mütəxəssis bildirib ki, onun üçün rəqibin kimliyi fərq etmir: “Biz qarşıdakı oyuna hazır olmalıyıq. Rəqibin Azərbaycan, yaxud Rumıniya olması fərq etmir. İstənilən halda bizi çox çətin qarşılaşma gözləyir”.

O, Bakıdakı dünya çempionatının yüksək səviyyədə təşkil olunduğunu vurğulayıb: “Bu, indiyə qədər oynadığımız ən gözəl stadiondur. Təşkilatçılıq möhtəşəmdir. Bu günə qədər hər hansı çatışmazlıq hiss etməmişik. Hər şey yüksək səviyyədə təşkil edilib”.

İbrahim Cəfərov