Azərbaycanda çempionatında U-23 limiti

Minifutbol üzrə Azərbaycan çempionatında 2024/2025 mövsümünün püşkü atılıb.

Futbolxeber.az saytının məlumatına görə, Tədbirdə Azərbaycan Minifutbol Federasiyasının (AMF) baş katibi Orxan Hüseynov, mətbuat xidmətinin rəhbəri Sərxan İbrahimoğlu, turnirə qatılacaq komandaların nümayəndələri və digər şəxslər iştirak ediblər.

İlk olaraq AMF-in 2017-ci ildən bu vaxtadək gerçəkləşdirdiyi layihələr haqqında məlumat verilib.

Ardınca ötən mövsümün ən yaxşı futbolçusu açıqlanıb. Bu ada "Birbaşa Bakı"dan Elvin Əlizadə layiq görülüb.

Tədbirdə turnirin reqlamenti barədə də məlumat verilib. Çempionatda 13 tur oynanılacaq və ardınca pley-off, 1/4 final, yarımfinal və final matçları baş tutacaq.

Eyni zamanda yeni mövsümdən 23 yaşlı futbolçularla bağlı limit tətbiq olunacağı açıqlanıb. Belə ki, hər komandanın heyətində mütləq bir nəfər 2001-ci il təvəllüdlü futbolçu olmalıdır. Bu addım U-23 milli komandasının inkişafına naminə atılıb. 23 yaşadək futbolçularla bağlı limitin növbəti mövsümlərdə də tətbiqi nəzərdə tutulub.

Fərəc Aslanov