Kapitan: “Məqsədimiz yenidən Avropa çempionu olmaqdır”

"Komandamız atmosfer əladır. Təlim-məşq toplanışımız da yüksək səviyyədə keçir. Məşqlərdə hər detalın üzərində çalışırıq. Hesab edirəm ki, Avropa çempionatına hazırıq”.

Futbolxeber.az saytının məlumatına görə, bu sözləri minifutbol üzrə milli komandamızın kapitanı Seymur Məmmədov deyib.

O, qarşıdakı Avropa çempionatında məqsədlərinin titulu qorumaq olduğunu bildirib: “Maksimum nəticə əldə etməyə çalışacağıq. Məqsədimiz yenidən Avropa çempionu olmaqdır”.

Seymur Məmmədov bildirib ki, son Avropa çempionatının finalında qələbə gətirən qolun müəllifi olsa da, bunu tək özünün uğuru hesab etmir: “Deməzdim ki, qələbəni mənim qol vurmağım gətirdi. Bütün uşaqların əziyyəti var idi. Sadəcə olaraq finalda qol vurmaq mənə qismət oldu. Qolu kimin vurmasının heç bir fərqi yoxdur. Bizə qələbə lazımdır. Azərbaycan xalqına qələbə sevinci bəxş etmək istəyirik”.

“Azərbaycan çempionatının sonuna yaxın zədəli idin. Hətta bu səbəbdən 1/4 final mərhələsinin cavab oyununda “Aznur”a qarşı keçirilən cavab oyununda meydana çıxmadın. Hazırda özünü necə hiss edirsən?” suakını təcrübəli oyunçu belə cavablandırıb: “Tam hazıram. Rəhbərlik hər şey etdi. Müalicəm və reablitasiyam yaxşı keçdi”.