Millimizin baş məşqçisi: “Ötən Avropa çempionatı ilə müqayisədə daha da güclənmişik”

“Ümumilikdə 2 aydır məşqlərə başlamışıq. Azərbaycan çempionatında mövsüm davam etdiyi üçün hazırlıqları fasilələrlə keçirdik. Komandada hər şey qaydasındadır, vəziyyət yaxşıdır. Sabah Bakıda sonuncu məşqimizi keçirəcəyik. Hər hansı bir problemimiz yoxdur. Düşünürəm ki, keçdiyimiz hazırlığın bəhrəsini görəcəyik”.

Futbolxeber.az saytının məlumatına görə, bu sözləri minifutbol milli komandamızın baş məşqçisi Elşad Quliyev deyib.

Qitə çempionatına hazırlaşan yığmamızın çalışdırıcısı qeyd edib ki, qrupdakı rəqiblərimiz yaxşı komandalardır: “Ağır qrupa düşmüşük, işimiz asan deyil. Hazırda dünya reytinqində 2-ci yerdəyik. Ən güclü komandalardan biri də bizik, iddialıyıq. Məqsədimiz qrup mərhələsini zədəsiz başa vurmaqdır. Rəqiblərdən Fransa və İtaliyanı təhlil etmişik. Yaxşı komandalardır. Amma zəif tərəfləri də var. Bunların üzərində işləyirik. Çalışacağıq ki, özümüzü yaxşı tərəfdən göstərək”.

“Rəqiblərlə müqayisədə millimizin üstün tərəfi hansılardır?” sualını E.Quliyev belə cavablandırıb: “Biz daha sürətliyik, daha texnikalı komandayıq. Bu üstünlüklərimizdən daha yaxşı istifadə etməliyik”.

O bildirib ki, məqsəd qrup mərhələsində az güc itirməkdir: “Çalışmaq lazımdır ki, daha az güc itirək. Bunu bacara bilsək, daha uzağa gedərik”.

Mütəxəssis komandanın qarşısına qoyulan hədəfdən də söz açıb: “Hədəf ancaq final oynamaqdır. Çünki biz hazırkı Avropa çempionuyuq. Düşünürəm ki, finala çıxa bilərik”.

Elşad Quliyev 2 il əvvəl Avropa çempionu olmuş komanda ilə hazırkı kollektivi müqayisə etmək istəməyib: “2022-ci ildə Avropa çempionu olmuşuq. Həmin heyəti müqayisə etmək istəməzdim. Bu heyətimiz də çox güclüdür. Komandaya yeni oyunçular cəlb etmişik. Böyük üstünlüyümüz odur ki, Azərbaycan çempionatı yüksək səviyyədə keçdi. Monteneqroda yaxşı turnirdə iştirak edib çempion olduq. Məncə, 2022-ci illə müqayisədə daha da güclənmişik. Futbolçularımız neçə ildir ki, yarışlarda iştirak edirlər. Ona görə özlərini meydançada daha rahat hiss edirlər”.