Xankəndidəki tarixi oyun Türkiyə mediasında

Türkiyənin "Desport Maqazin" jurnalında Azərbaycan kubokunun 1/8 finalının "Qarabağ" - MOİK oyununun (1:0) Xankəndində keçirilməsi ilə bağlı yazı yayımlanıb.

 

Futbolxeber.az saytının qol.az-a istinadən verdiyi məlumata görə, “Qarabağ Azərbaycandır!” adlı yazıda Ağdam təmsilçisinin aid olduğu torpaqlarda işğal bitdikdən sonra ilk matça çıxdığı xatırladılıb: "Qarabağdakı işğalçı rejimin vaxtilə “paytaxt” kimi gördüyü Xankəndindəki stadion 30 ildən sonra Azərbaycan kuboku oyunu ilə azarkeşlərin üzünə açıldı".

 

Yazıda matçın Prezident İlham Əliyevin topa zərbə vurması ilə başladığı qeyd olunub: "Çoxsaylı azarkeşlərin izlədiyi oyundan əvvəl İlham Əliyev çıxışında işğaldan azad edilmiş rayonda ilk dəfə futbol matçının keçirildiyini söylədi. Azərbaycan xalqının artıq öz torpaqlarına qayıtdığını vurğulayan Əliyev “Bugünkü matçın nəticəsi nə olursa olsun, qalib bəllidir. Qalib Azərbaycan xalqıdır, Azərbaycan dövlətidir" - deyib. Əliyev Xankəndində idman bayramı yaşandığını vurğuladı. “Bundan sonra Azərbaycan bayrağı bu torpaqlarda əbədi dalğalanacaq. Biz azərbaycanlılar əbədi burada yaşayacağıq. Yaşasın Qarabağ. Yaşasın şanlı ordumuz. “Qarabağ Azərbaycandır" - deyə yazıda İ.Əliyevdən sitat gətirilib.

 

Yazıda o da bildirib ki, İlham Əliyev və xanımı Mehriban Əliyeva matçı müharibədə şəhid olan şəxslərin övladları ilə birlikdə izləyib. Tribunalarda yer alan azarkeşlərin matçı əllərində Türkiyə və Azərbaycan bayraqları ilə izlədiyi qeyd olunub.

 

Yazıda “Qarabağ”ın baş məşqçisi Qurban Qurbanov, matçda yeganə qolun müəllifi olan Ağdam klubunun gənc hücumçusu Nəriman Axundzadənin də fikirlərinə yer verilib.