Neftçi Azarkeş Dərnəyi təqdimatını etdi

Bu gün Neftçi Azarkeş Dərnəyinin (NAD) təqdimat mərasimi keçirilib.

Futbolxeber.az saytının məlumatına görə, Kənan Hənifəyev yaradıcısı, rəhbəri olduğu dərnək haqda danışıb.

O bildirib ki, NAD 9 aprel 2023-cü il tarixində bir qrup “Neftçi”sevərlərin görüşündən sonra ideya olaraq ərsəyə gəlib: "Bundan sonra dərnəyin formalaşması, sistemi, strukturlaşma və gələcək fəaliyyət planı barəsində işlərin görülməsinə start verildi. 18 aprel tarixindən dərnək NAD olaraq təşkilatlanaraq qapalı fəaliyyət göstərməyə başladı. Dərnək azarkeş fan qrupu və klubu deyil, “Neftçi” futbol klubunun azarkeşlərini birləşdirən birlikdi. Biz "Neftçi" azarkeş fan-klubu deyil, tribunada olmayacağıq, hər hansı banerin arxasında duraraq "Neftçi"yə dəstək olan qurum deyilik".

Hənifəyev deyib ki, dərnəyin əsas məqsədinin “Neftçi”nin gələcək fəaliyyətində, müdafiəsində, azarkeş tribunasının inkişafı və təşkilatlanmasında rol oynamaq, klubun daxilində və xaricində baş verən neqativ proseslərə qarşı mövqe bildirmək, komandanın və klubun uğurlu olmasına dəstək vermək, bütün “Neftçi” azarkeşlərinin şəbəkələşməsinə vasitə olmaqdı: "Neftçi”nin peşəkar idarəetməsində və uğurlarının dayanaqlı olmasında azarkeş olaraq komandamızın yanında olmaq və uğurlu olmasına çalışmaq dərnəyin əsas ideyalarındandır. Neftçi Azarkeş Dərnəyi “Neftçi” azarkeşlərindən ibarət olan heyət və üzvlər tərəfindən idarə olunacaq. Dərnəyin tədbirlər planı, gələcək fəaliyyəti sistemi, strukturlaşması və bölmələri barədə yaxın zamanda daha ətraflı məlumat paylaşılacaq. Dərnəyin departamentləri olacaq və birbaşa olaraq öz maliyyələşmə sistemiylə fəaliyyət göstərəcək. hər hansı kluba aiddiyyəti yoxdu və müstəqil fəaliyyət göstəririk".

K.Hənifəyevin sözlərinə görə, yaşı 25-dən yuxarı olan (doğum tarixi 18.03.1998-ci il və daha yaşlı şəxslər) “Neftçi” azarkeşləri qeydiyyatdan keçərək üzvlük üçün müraciət göndərə bilərlər. “Neftçi Azarkeş Dərnəyi”nin alt sosial media ictimai məhsul adı “N1937” şəbəkəsidi: "İdarə Heyətimiz 7 nəfərdən ibarət olacaq. Hələlik 5 nəfərlə təmsil olunuruq. Bildiyiniz kimi, "Neftçi"nin fəaliyyəti ilə bağlı azarkeşlərin narazılığı çox idi. Biz də bir növ azarkeşlərimizin birgə toplanması, ümumi vəhdət şəklini alması üçün belə qərara gəldik ki, bu dərnəyi formalaşdıraq. Bəli, bu, çətin prosesdi, indiyədək ölkədə belə qurum olmayıb. İndiki halda qarşıda çətinliklərimiz var və buna hazırıq. Düşünürəm ki, istəyimiz çox zaman aparacaq, amma son məqsəd olaraq bütün "Neftçi"sevərləri bir dərnək ətrafında birləşdirə biləcəyik. Əlbəttə, burda müxtəlif fan-klublar olacaq. Buna qarşı da deyilik və heç birinin işinə müdaxilə etməyəcəyik. Üzvlüklə bağlı müraciətləri nəzərdən keçirib seçim edəcəyik".