Binə stadionunda 100-cü oyun

İyulun 13-də Binə stadionunda Həvəskarlar liqasının “Binə” – “Mingəçevir” oyunu keçirilib. Futbolxeber.az-ın məlumatına görə, bu qarşılaşma Binə stadionu üçün əlamətdar olub. Qeyd olunmuş oyun, fəaliyyətdə olduğu 260 gün ərzində bu arenada keçirilmiş 100-cü qarşılaşmadır (orta hesabla hər 3 gündə 1 oyun). Binə stadionunda təşkil olunmuş ilk oyun 2012-ci il sentyabrın 17-ə təsadüf edib. Həmin gün burada FIFA U-17 qadınlararası dünya çempionatı Azərbaycan 2012 çərçivəsində Kanada və Çin yığma komandaları üz-üzə gəlib.

Xatırladaq ki, Bakının Xəzər rayonunun Binə qəsəbəsində Heydər Əliyev Fondunun təşəbbüsü ilə AFFA tərəfindən FIFA standartları səviyyəsində tikilmiş bu stadionun 2012-ci il sentyabrın 13-də keçirilmiş açılış mərasimində Azərbaycanın birinci xanımı, Heydər Əliyev Fondunun prezidenti, Milli Məclisin deputatı Mehriban Əliyeva iştirak etmişdi.