“Zirə”lilər məktəbdə: “Qarabağ”la oyundan da söhbət açıldı

“Zirə”nin baş məşqçisi Ayxan Abbasov, futbolçulardan kapitan Elvin Məmmədov, Kamal Bayramov, Yovan Krneta, Viktor İqbekoyi, Anar Nəzirov və Riçard Qadze Zirə qəsəbəsində yerləşən Ziya Ağayev adına 241 nömrəli tam orta məktəbdə görüş keçirib. Futbolxeber.az saytının məlumatına görə, tədbirdə məktəbin müəllim və şagird heyəti, həmçinin bəzi fəal azarkeşlər iştirak ediblər. 

 

Əvvəlcə çıxış edən məktəb direktoru Eldəniz Cabarov sözügedən komandanın heyətini təqdim edib. Ardından baş məşqçi Ayxan Abbasov söz alıb. Mütəxəssis yerli uşaqları futbola cəlb etmək üçün görüləcək işlərdən danışıb. Ayxan müəllim gələcəkdə istedadlı uşaqları üzə çıxarmaq və qəsəbədə futbolun təbliğatına təkan vermək məqsədi ilə məktəblilər arasında yarışların təşkil edilməsinin vacibliyini önə çəkib. Bundan sonra isə müəllim və şagirdlərlə komanda üzvləri arasında səmimi söhbət olub. Məktəblilər öz istəklərini dilə gətirməklə yanaşı, qarşıdakı “Qarabağ”la oyunda “Zirə”yə uğurlar arzulayaraq, stadiona gəlib dəstək olacaqlarını deyiblər.