Veteranlar Daşkənddə Heydər Əliyev Mərkəzində

Xəbər verdiyimiz kimi, ümummilli lider Heydər Əliyevin 90 illik yubileyi münasibətilə respublikamızın Özbəkistandakı səfirliyinin təşkilatçılığı ilə aprelin 27-də, Daşkənd şəhərində Özbəkistan və Azərbaycanın futbol veteranları arasında yoldaşlıq oyunu keçiriləcək. Futbolxeber.az-ın məlumatına görə, bu məqsədlə Özbəkistanda səfərdə olan futbol veteranlarımız səfirliyin əməkdaşları ilə birgə Heydər Əliyevin Daşkənd şəhərindəki abidəsini və "Paxtakor" klubunun təyyarə qəzasında həlak olan üzvlərinin məzarını ziyarət edərək AFFA-nın adından əklil qoyublar. Səfirliyin nəzdində yaradılmış Heydər Əliyev Mərkəzinə gedən veteranlar ümummilli liderin həyatının müxtəlif dövrlərini əks etdirən fotolarla tanış olublar. Azərbaycanın Özbəkistandakı fövqəladə və səlahiyyətli səfiri Hüseyn Quliyev qeyd edib ki,  özbək və azərbaycanlı uşaqların hər iki dövlətə və xalqa həsr etdikləri rəsmlər də burada toplanır.