Tanınmış musiqiçi: “Suarezin göz yaşlarını görmək çox xoş idi”

“Mançester Siti”nin azarkeşi, “Oasis” rok-qrupunun keçmiş gitaraçısı Noel Qallaxer “Liverpul”un dünən “Kristal Pelas”la oyunda 2 mühüm xal itirməsinə münasibət bildirib. Futbolxeber.az-ın məlumatına görə, 46 yaşlı tanınmış musiqiçi “qırmızılar”ın üzvü Luis Suarezi təhqir etməkdən belə çəkinməyib: “Suarezin göz yaşlarını görmək çox xoş idi. Çünki o, təkəbbürlü yaramazın biridir. Cerrardın görkəmi də adama ləzzət edirdi. Suarezin jurnalistlərin sorğusunda ilin futbolçusu seçilməsinə heç cür inana bilmirəm. “Liverpul” oyunun gedişində 3:0 hesabı ilə öndə olsa da, futbolçular emosiyaya qapıldılar. “Tottenhem” və “Arsenal”la qarşılaşmırsınızsa, Premyer Liqada 6-7 top fərqi ilə qələbə qazanmaq çox çətindir”.

Xatırladaq ki, 46 yaşlı Noel Qallaxer “Mançester Siti”nin qatı fanatıdır. O, hələ 2 il əvvəl Ukrayna və Polşada keçirilən Avropa çempionatında İngiltərəni “Mançester Siti”nin bayrağı ilə dəstəkləməklə diqqətləri üzərinə cəlb etmişdi.