“Simurq”un futbolçularından örnək addım

U-13 liqasının final mərhələsində mübarizə aparan “Simurq”, bu gün xalqımızın müqəddəs and yeri olan Şəhidlər xiyabanını ziyarət edib. Futbolxeber.az-ın klubun rəsmi saytına istinadən verdiyi məlumata görə, Zaqatala klubunun futbolçuları Azərbaycanın azadlığı, müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının əziz xatirəsini ehtiramla yad edib, onların  məzarları önünə tər qərənfillər düzüblər.

Qeyd edək ki, C qrupunda mübarizə aparan “Simurq”un U-13 komandası sabah "Neftçi" ilə üz-üzə gələcək. Dünən Astaranın "Sərhədçi" klubunu 2:1 hesabı ilə məğlub edən Zaqatala təmsilçisinin hazırda hesabında 4 xalı var. Bu görüşdə bir xal qazansa 1/4 final mərhələsində mübarizəni davam etdirəcək.