“D”-də çabalamaqdan yuxuda diksinməyə qədər…

Yaxın keçmişdə milli komandamız ardıcıl beş qələbə qazanırdı, Belarus (evdə), Slovakiya (səfərdə), Qazaxıstan (evdə), Moldova (səfərdə) və Şimali Makedoniyanı (səfərdə) məğlub edirdi, razı qalmırdıq, nəticələrə ağız büzürdük. Yığmamız Millətlər Liqasının C Liqasında qrup ikincisi olurdu, narazılıq edirdik, indi Avropada milli səviyyəsində futbolun ən dibi hesab edilən D Liqasında FİFA reytinqində 149-cu olan Litva ilə görüşdə heç-heçəyə sevinirik... Halbuki yuxarıda adını çəkdiyim 5 kollektivdən 4-ü – Moldova xaric – FİFA reytinqində bizdən öndə idi...

Vaxt olub ki, Avropa çempionatının seçmə mərhələsində, rəsmi görüşdə millimiz Bakıda İsveçi 3:0 hesabı ilə məğlub edib, ona da mız qoymuşuq. Ki, bu oyunun heç bir əhəmiyyəti yoxdur. Guya dünənki Litva ilə matç həyati əhəmiyyət daşıyırdı axı... Onsuz da yeni mövsümdən UEFA Millətlər Liqasında D Liqası olmayacaq və biz də C Liqasında yarışacağıq...

Oyun olub ki, ilk hissədə Qazaxıstanla matçda 0:2 geri düşsə də, millimiz geridönüş edib və 3:2-lik qələbə qazanıb. Amma həmin vaxt yığmaya rəhbərlik edən Arif Əsədovun işinə ağız büzmüşük. Yox e, milliyə gərək Fernandu Santuş rəhbərlik edə. Axı o, bizə fövqəlnəticələr qazandıracaq. “Qazandırdı” və bu gün Azərbaycan yığması, yuxarıda da qeyd etdiyimiz kimi, milli səviyyəsində futbolun ən dibi hesab edilən D Liqasında çabalayır...

Qəribə adamlarıq e... Vaxt var idi AFFA-nın baş katibi Elxan Məmmədovu günün 25 saatı, həftənin 8 günü tənqid edirdik ki, niyə nəticə yoxdur. Niyə Azərbaycanda futbolçu yetişmir, niyə millimiz uğurlu nəticələr qazanmır, niyə qadın futboluna bu qədər diqqət ayrılır? İndi isə milli qələbə qazana bilməyəndə deyirik ki, Cahangir Fərəcullayev? Baş katib “priçom”?.. Bəlkə baş katib meydana çıxıb futbol oynamalıdır, bəlkə klubların yerinə futbolçuları baş katib yetişdirməlidir?

P.S. əvəzi onu da deyim ki, futbol beynimi necə qarışdırıbsa, qəribə yuxular görməyə başlamışam. Dünən gecə görürəm ki, milli ilə Lixtenşteyn səfərinə hazırlaşıram, evdən çıxmaq üzrəykən AFFA-dan zəng gəlir: “2 gün əvvəl filan yazınızda filan komitə sədri istefa verməlidir” cümləsinə yer verdiyiniz üçün adınız səfər siyahısından çıxarılıb, heç yana getmirsiniz...” Yerimdən dik atıldım e. Nəinki həyatda, yuxuda belə bu cür hadisə inanılmaz sayılır...

İBRAHİM