Həsənovun “unutduğu” epizod

AFFA Hakimlər Komitəsinin sədri Rəhim Həsənov Azərbaycan Premyer Liqasının 5-ci turunda qeydə alınan mübahisəli epizodlarla bağlı fikirlərini bildirib. O, "Kəpəz" - "Qəbələ" və "Araz-Naxçıvan" - "Turan Tovuz" görüşlərindəki məqamları dəyərləndirib. Həsənov "Turan Tovuz"un qapısına 86-cı dəqiqədə təyin edilən və qolla nəticələnən penalti epizodu zamanı baş hakim Elçin Məsiyevin səhvə yol verdiyini etiraf edib. Referinin VAR-a baxdıqda sonra penalti qərarını ləğv etməli olduğu bildirilib.

Komitə sədrinin hakimin səhvinə bəraət qazandırmaması, həqiqəti etiraf etməsi müsbət məqamdır. Lakin Rəhim Həsənovun şərhində bir məqam diqqətimizi çəkdi. Belə ki, komitə sədri şərhində nədənsə turun mərkəzi matçı – “Zirə” - “Qarabağ” matçını “unutdu”. Halbuki həmin görüşdə də şərh oluna biləcək məqam var idi. Söhbət matçın 70-ci dəqiqəsindəki epizoddan gedir. Belə ki, “Qarabağ”ın müdafiəçisi Bense Varkonyi rəqib hücumçu İssa Cibrilanın qarşısını kəsməyə çalışarkən ayağı ilə onun başına zərbə endirir. Matçın baş hakimi Rəşad Əhmədov bu epizodda sarı vərəqə ilə kifayətlənir. “Zirə” tərəfi buna etiraz etsə də, VAR-dan hər hansı müdaxilə gəlmir. Görünür, “Qarabağ”ın digər müdafiəçisi Mateus Silvanın epizoda yaxın olması səbəbindən referi qırmızı deyil, sarı vərəqə göstərir. Heç biz də bu epizodda qırmızı vərəqə olduğunu iddia etmirik. Sadəcə maraqlı olan Rəhim Həsənovun bu epizodu görməzdən gəlməsidir. Sabiq referi ən azı epizodu şərh edə, Rəşad Əhmədovun düzgün qərarını qaydalarla əsaslandıra bilərdi. Lakin görünən odur ki, Rəhim Həsənov özünü əziyyətə salmaq istəməyib. Bu epizodu heç şərh etməyə belə ehtiyac duymayıb. Maraqlıdır ki, bu görüşün hakim-inspektoru Rəhim Həsənovun özü idi. Yəqin ki, komitə sədri bununla özünün olduğu oyunda hər hansı narazılıq yaşanmadığı bildirmək istəyib. Nə deyək...

Yeri gəlmişkən, Rəhim Həsənovu Zirədə görərkən yadıma Hakimlər Komitəsinin sabiq sədri Xaqani Məmmədovun bir sözü düşdü. Belə ki, Məmmədov xələfi, türkiyəli Barış Şimşekin AFFA Hakimlər Komitəsinin sədri ola-ola Azərbaycan Premyer Liqasının oyunlarına hakim-inspektor kimi təyinat almasına etiraz edirdi. Görəsən, Xaqani bəy keçmiş tələbəsi olan Rəhim Həsənov barədə də eyni fikirdədir?..

İBRAHİM