AFFA-nın “yad balaları” və ya “Şəfa”lı dejavü...

Dünən “Sabah” klubunun 9 yaşı tamam oldu. Təbii ki, belə bir əlamətdar gündə klubun rəsmi, qeyri-rəsmi sosial media hesablarında təbrik yayımlanması normaldır. Lakin dünənin ən gözlənilməz təbriki AFFA-dan gəldi. İndi bu cümləni oxuyub kimsə “assosiasiyanın bir klubu təbrik etməsində qeyri-adi nə var ki” sualını ünvanlaya bilər. Məsələ ondadır ki, birincisi, 9 yaş xüsusi bir yubiley deyil. 10, 50, yaxud 100 olsaydı, bunu hardasa başa düşmək olardı, bu, normal qarşılanardı. 9 yaş nə vaxtdan qeyri-adi ad günü hesab olunur?

İkincisi də, daha əvvəl buna bənzər təbrik görməmişik. Çox uzağa getməyək, sentyabrın 1-də “Qəbələ” klubunun 21 yaşı tamam olurdu. Amma nədənsə assosiasiya “Qəbələ”ni təbrik etmədi. Halbuki “qırmızı-qaralar” daha əvvəl yaranıb, bu 21 ildə də az uğur qazanmayıb. Yeri gəlsə, infrastrukturuna, yetirmələrinə görə “Qəbələ”nin Azərbaycan futboluna faydası “Sabah”dan qat-qat çox olub. “Qəbələ” başqaları kimi “hər şeyə hazıra nazir” olmayıb. Gəl ki, “qırmızı-qaralar”ın 21 yaşını görməzdən gələn AFFA “Sabah”ın 9 yaşında canfəşanlıq edir. Məcazi mənada desək, AFFA Azərbaycan futbolunun atasıdırsa, klublar da onun övladlarıdır. 21 yaşlı övladını təbrik etməyib, 9 yaşlı uşağının ad günündə əldən-ayaqdan gedən ata təsəvvür edirsiniz?

Dəfələrlə yazmışıq, “təkrar biliyin anasıdır” prinsipini əsas tutaraq, bir daha qeyd edirik ki, bu gün AFFA “Sabah”, “Sabah” da AFFA deməkdir. Klubun rəsmi, qeyri-rəsmi rəhbər şəxsləri assosiasiyada da yüksək post tuturlarsa, başqa necə olmalıdır ki?

AFFA-nın “Sabah” sevgisi özünü hər sahədə göstərir. Məsələn, bu gün Bakıda əksər stadionlar "Sabah”ın balansındadır. Masazırda stadionu, Şüvəlanda bazası olan komandaya bunlar dar gəldi. Nəticədə əvvəlcə “Bayıl Arena”, daha sonra Mərdəkandakı “Dalğa Arena” “Sabah”ın balansına keçdi. İlahi, bir klubun neçə stadionu olar? Yaxud bu qədər stadion kimə, nəyə lazımdır? Bu gün istəyərək, yaxud istəməyərək Bakıda məskunlaşmış “Zirə”, “Şəfa”, “Səbail”, “Araz-Naxçıvan”, “İmişli” kimi klublar məşq etməyə meydança tapmırlar, hamı Bakı Olimpiya Stadionunun məşq meydançalarına lövbər salıb, növbəsini gözləyir, “Sabah”ın isə balansında 4 stadion var. Bu, nə dərəcədə ədalətlidir? Yaxud bu şəkildə ölkə futbolunun inkişafından necə danışa bilərik?

Deyəsən, dejavü yaşayırıq axı. Sanki 2000-ci illərin əvvəlinə qayıtmışıq, bir tərəfdə Fuad Musayev var, digər tərəfdə “Şəfa”... Təki, sonluq 25 il əvvəlki kimi olmasın...

İBRAHİM