Füzuli Məmmədov fərqi və ya 6 xallıq qələbə

Dünən keçirilən 3 oyunla Azərbaycan I Liqasında VI tura yekun vuruldu. Buna qədər isə turun mərkəzi matçı “Şahdağ Qusar” və “Səbail” arasında oynanıldı. Mövsümə ardıcıl 4 qələbə ilə başlayan Füzuli Məmmədovun komandası ötən tur gözlənilmədən “Xankəndi”yə uduzmuşdu. “Səbail” isə əksinə, Zaqatala səfərindən 3 xalla qayıtmaqla Qusar klubu ilə aradakı xal fərqini 1-ə endirmişdi. Odur ki, matçdan öncə psixoloji üstünlük “Səbail”in tərəfində idi. Qələbə qazanacağı halda paytaxt klubu liderliyə yüksələcəkdi.

Buna baxmayaraq, “Səbail” istəyinə çata bilmədi. 90 dəqiqə ərzində rəqibindən üstün olan “Şahdağ Qusar” vacib qələbə qazandı. Bununla da, Füzuli Məmmədovun komandası həm turnir cədvəlində mövqeyini qorudu, həm “Səbail” üzərində şəxsi oyunlarda üstünlük qazandı, həm də 1 tur əvvəlki məğlubiyyətin təsadüfi olduğunu göstərdi.

“Gəncəbasar”, “Karvan-Yevlax” və MOİK də iddialı olsa da, I Liqada çempion adına əsas namizəd “Şahdağ Qusar”la “Səbail”dir. Bu iki komandanı müqayisə etsək, istər heyətinə, istərsə də maddi durumuna görə üstünlük paytaxt klubunun tərəfindədir. Qusar klubunun heyətinin zəif olduğunu, yaxud maddi sıxıntı yaşadığını söyləmək olmaz. Amma söhbət bu iki klubun müqayisəsindən gedir. “Səbail”in heyətində elə təkcə 7 legioner olduğunu demək kifayət edər. Əvəzində “Şahdağ Qusar”ın rəqibi ilə müqayisədə iki böyük üstünlüyü var. Biri azarkeşləridir, digəri isə baş məşqçisi.

Bu gün “Şahdağ Qusar”ın inamlı çıxışında Füzuli Məmmədov amili böyük rol oynayır. Təcrübəli mütəxəssis əla kollektiv formalaşdırıb. “Şahdağ Qusar” bu gün təkcə qazandığı nəticələr yox, həm də sərgilədiyi oyunla diqqət çəkir. Xüsusən də “Səbail” kimi rəqiblərlə oyunlarda baş məşqçi amili böyük rol oynayır. Füzuli Məmmədov fərqi məhz bu cür vacib matçlarda ortaya çıxır...

Təsadüfi deyil ki, “Şahdağ Qusar” geridə qalan 6 turda artıq əsas rəqiblərindən üçünü – MOİK, “Karvan-Yevlax” və “Səbail”i məğlub edib. Əslində Füzuli Məmmədovun işinin uğurlu alınması qətiyyən təəccüblü də deyil. Son iki ilə diqqət yetirsək, Məmmədov əvvəlcə I Liqada mövsümün ortasında sonuncu yerdə qəbul etdiyi “Mingəçevir”i nəinki çempionatda saxladı, komanda hətta yekunda 4-cü oldu. Düzdür, ötən il “Karvan-Yevlax” Premyer Liqada yerini qoruya bilmədi, lakin hamı təsdiqləyər ki, Yevlax klubu məhz Füzuli Məmmədovun gəlişindən sonra inamlı təsir bağışladı və xallar topladı. Təcrübəli mütəxəssis komandaya mövsümün əvvəlində gəlsəydi, hər şey fərqli olardı. Həmin uğurlu işini Füzuli Məmmədov bu gün də “Şahdağ Qusar”da davam etdirir. Azarkeşlər və rəhbərlik də baş məşqçinin arxasındadır. Odur ki, “Şahdağ Qusar”ın Füzuli Məmmədovun rəhbərliyi altında gələcəkdə də bu cür vacib qələbələr qazanacağı şübhə doğurmur...

İBRAHİM