Ehtiram Quliyev: “Keçmişdə nələrin baş verdiyi haqqında düşünmürük”

“Turan Tovuz”un İdarə Heyətinin sədri Ehtiram Quliyev klubun avrokuboklardan uzaqlaşdırılması barədə UEFA qərarına ilk dəfə münasibət bildirib.

Futbolxeber.az saytının məlumatına görə, o bu barədə jurnalistlərə danışıb:

"Biz keçmişdə nələrin baş verdiyi haqqında düşünmürük, bu gün xoş şeylər barədə danışmaq istəyirik. Keçmişə çox boylansaq, elə orada da qalarıq. Bizim yolumuz ancaq irəliyədir. Bu tədbirin əsas mahiyyətlərindən biri də onu göstərməkdir ki, biz ruhdan düşməmişik, əksinə, daha enerjili və yeni qüvvələrlə yola davam edirik”.

Quliyev gələcək hədəflərində də söz açıb:

“Buradan hamıya elan edirik ki, builki hədəfimiz çempionluqdur. Ən azından mövsümün sonuna qədər çempionluq yarışının içində olmaq istəyirik. Əminliklə deyə bilərəm ki, bu mövsüm keçən ildəkindən daha güclü, daha dinamik və daha keyfiyyətli "Turan Tovuz" görəcəksiniz".