“Şəfa”, yoxdur səndə vəfa...

Həyətimizdə bir pişik var, adı “Totu”dur, qızım qoyub adını. Təxminən bir ilə yaxındır ki, həyətimizin daimi sakininə çevrilib. Göz açdığı gündən südü, yeməyi, suyu əskik olmur. Dostum və həmkarım Ruslan Mikayıllı demişkən, şəllənir. Gəl ki, son 2-3 həftədə “Totu” özünü yaxşı aparmır, bit-birə basıb. İki dəfə xüsusi dərman alıb, dezinfeksiya etsəm də, xeyri yoxdur. Axırda “Totu”nu azdırmaq qərarına gəldim. Allahın heyvanıdır, istəməzdim həyətimizdən uzaqlaşsın, amma hər bir valideyn üçün övladının sağlamlığı hər şeydən önəmlidir. Bu səbəbdən evdən təxminən 2 kilometr məsafəyə qədər apardım, yemək verib başını qatdım və oradan uzaqlaşdım. İki gün keçdi, səhər yuxudan duranda gördüm “Totu” yenidən həyətdədir. Bu dəfə daha uzaq məsafə seçdim və pişiyi təxminən 7-8 kilometr uzağa apardım. 3 gün keçdi, düşündüm ki, məsələ artıq qapanıb. Amma bu səhər oyanıb gördüm ki, “Totu” yenidən qayıdıb. Əziyyətimin hədər getməyinə heyifsilənsəm də, heyvanın sadəqatinə heyran oldum. Doğrudan da, heyvanlar insanlardan daha etibarlı, daha vəfalıdırlar. Hörmətli oxucu, giriş bir az uzun oldu, amma sözümün canı insanların vəfasızlığıdır. Xüsusən də futbolda vəfasızlıq baş alıb gedir. Çox uzağa getməyək, götürək Premyer Liqaya yüksələn “Şəfa” klubunu. Bu dəqiqədə “Azərbaycan futbolunda ən vəfasız klub hansıdır” adlı sorğu keçirilsə, əminəm ki, Premyer Liqanının debütantı qalib olar...

Daha əvvəl də bu haqda yazmışdım. Biz mövsüm ərzində bir neçə dəfə çempionat başa çatdıqdan sonra komandada baş məşqçi dəyişikliyi olacağı barədə xəbər yayımlamışdıq. Hər dəfəsində də klub rəhbərliyi bu ehtimalı yaxına buraxmır, yayılan məlumatın əsassız olduğunu iddia edirdi. Lakin mövsüm başa çatan kimi Elgiz Kərəmli baş məşqçi postundan uzaqlaşdırıldı. Halbuki “Şəfa”nı II Liqadan I Liqaya, oradan da Premyer Liqaya daşıyan məhz Kərəmli olmuşdu. Təbii ki, pulu kim verirsə, sifarişi də o edir. Biz kiminsə işinə qarışa bilmərik. Amma Elgiz Kərəmlini göndərib adını “təcrübəsiz” qoydular. Elgiz bəyin xələfi isə Zaur Həşimov oldu. Guya Həşimov 20 ildir Premyer Liqada çalışır. İki məşqçi arasında təcrübə baxımından böyük fərq yoxdur. Hətta iki ildir komandada olması, futbolçuları daha yaxından tanıması bu ikilinin arasında üstünlüyü Elgiz bəyə verir.

Gəl ki, klub rəhbərliyi yola Kərəmli ilə davam etmək istəmədi. Baxmayaraq ki, deyilənlərə görə, gənc məşqçinin müqaviləsində komandanı Premyer Liqaya daşıyacağı halda sözləşməninn avtomatik artırılması ilə bağlı bənd var idi. Görünən odur ki, “Şəfa” Elgiz bəyə qarşı vəfasızlıq nümayiş etdirdi. Mütəxəssisin 2 ildə çəkdiyi əziyyət bir anda yerə vuruldu. Cəfasını çəkən Elgiz Kərəmli oldu, səfasını çəkən isə Zaur Həşimov...

Dünən məlum oldu ki, “Şəfa”nın vəfasızlığının qurbanı təkcə Elgiz Kərəmli deyil. Komanda aparıcı üzvü Emin Zamanova da qapını göstərdi. 11 qolla ötən mövsüm I Liqada “Şəfa”nın bombardiri olan, komandanın Premyer Liqaya yüksəlməsində böyük pay sahibi olan 29 yaşlı futbolçuya bu gün ehtiyac duyulmur. Bu, nə dərəcədə ədalətlidir? Emin Zamanovun 39 yaşı yoxdur axı. 29 yaşı var. Nəyə görə futbolçunun bir il çəkdiyi əziyyəti yerə vurursunuz? “Şəfa”nın Premyer Liqa yüksəlməsində Elgiz Kərəmlinin rolu olub, Zaur Həşimovun yox. I Liqada qazanılan çempionluqda Emin Zamanovun payı var, bu gün bəh-bəhlə komandaya cəlb olunan futbolçuların yox... “Şəfa” rəhbərliyi unutmasın ki, futbol hər nə qədər ədalətsiz oyun olsa da, zamanı gələndə haqqı tapdalananların haqqını elə qoruyur ki...

İBRAHİM