Füzuli Məmmədov: “Şans varsa, sona qədər mübarizə aparacağıq”

"Karvan-Yevlax" Azərbaycan Premyer Liqasının 30-cu turunda doğma meydanda "Neftçi"yə 0:3 hesabı ilə uduzub.

Futbolxeber.az saytının məlumatına görə, Yevlax təmsilçisinin baş məşqçisi Füzuli Məmmədov matçdan sonra keçirilən mətbuat konfransında jurnalistlərin suallarını cavablandırıb:

- Oyun barədə çox danışmağa lüzum görmürəm. Ciddi hazırlaşmışdıq. Düşünürdük ki, evdə daha yaxşı oynayacağıq. İlk qola qədər komanda planlı oynayırdı. Sadəcə mövqe səhvindən buraxdığımız qol mənfi təsir etdi. Üç oyunumuz qalıb. Şans varsa, son ana qədər mübarizə aparacağıq. "Neftçi"ni təbrik edirəm.

- İlk qoldan sonra komandanın oyununda düşüş olmasının səbəbi nədir?

- Düşünmürəm ki, birinci qol bizi sındırdı. Birinci hissənin sonlarında rəqibin belə rahat qol vuracağını gözləmirdik. Deyərdim ki, ikinci qoldan sonra oyunumuzda düşüş baş verdi. Bu da normaldır. Məğlub olmaq istəmirdik. 0:2 hesabından sonra geridönüş etmək çox çətin idi.

- "Qəbələ" ilə öz oyunlarınızı müqayisə edəndə kimin təqviminin daha çətin olduğunu düşünürsünüz?

- "Qəbələ" üçün də, bizim üçün də çətin oyunlar var. Aramızda 6 xallıq fərq var və "Qəbələ" ilə evdə oynayacağıq. 6 xallıq fərqi aradan qaldırmaq üçün hər oyuna ciddi hazırlaşacağıq.

- Adətən son turlarda eyni hədəflər uğrunda mübarizə aparan komandaların oyunları eyni saatda olur. Bizdə isə hazırda belə deyil. Bununla bağlı nə düşünürsünüz?

- Biz az istirahət edəcəyik. Amma təqvim belədir. Planımızı təqvimə uyğun tutmağa çalışacağıq.