“Səbail”də yeni sponsor?

Bu gün müxtəlif sosial media platformalarına istinadən “Səbail” klubuna yeni sponsorun cəlb olunması ilə bağlı məlumatlar dolaşıb.

Futbolxeber.az saytının məlumatına görə, ötən mövsümün yekununda ASCO ilə əməkdaşlığı başa çatdıqdan sonra Bayıl təmsilçisi daxili imkanları hesabına fəaliyyət göstərir.

“Daxili imkanlar”ın isə özündə bir o qədər də böyük büdcə ehtiva etmədiyi heç kim üçün sirr deyil. Belədə, hazırda Birinci Liqada ikinci pillənin sahibi olan kluba yeni sponsorun gəlişi ilə bağlı xəbərləri diqqətdən kənarda saxlaya bilməzdik.

“Səbail”in mətbuat xidmətinin rəhbəri Rəşad Məmmədov informasiyanı qismən təsdiqlədi:

“Hələ cari mövsümün startından əvvəl klubumuza yeni sponsorun cəlb olunması ilə bağlı müxtəlif işlər görülür, görüşlər keçirilir. Bir neçə gün əvvəl isə “Şuşa” PFK tərəfindən əməkdaşlıqla bağlı bizə müraciət daxil oldu. Bu gün tərəflər arasında ilk görüş keçirilib. Görüşdə qərara alınıb ki, hər iki tərəfi qane edəcək şərtlər olarsa, gələcəkdə klublar əməkdaşlıq edəcək. Bu, sponsorluq və ya digər formada əməkdaşlıq ola bilər. Hələ ki detallar razılaşdırılmayıb. Bugünkü görüşdə əməkdaşlıqla bağlı niyyət protokolu imzalanıb. Əlavə hər hansı müqavilə imzalanacağı, bu və ya digər şəkildə əməkdaşlıq razılaşması dəqiqləşəcəyi təqdirdə ictimaiyyətə məlumat veriləcək”.