“Neftçi”nin oyunlarında 5 il əvvəl də VAR yox idi, indi də...

Dünən “Zirə” - “Neftçi” oyununda yaşanan hakim qalmaqalı geniş müzakirələ yol açıb. “Zirə”nin vurduğu qolda hakimlərin ofsayt qeydə almaması böyük narazılığa səbəb olub.

Maraqlıdır ki, buna bənzər hal Azərbaycan çempionatında təxminən 5 il əvvəl də yaşanmışdı. Belə ki, 2021-ci il aprelin 25-də keçirilən “Sabah” - “Neftçi” (2:2) oyununda qonaqlar üçüncü qolu vursalar da, hakimlər Keysuke Hondanın fərqləndiyi epizodda ofsayt qərarı qəbul etmişdilər. Yan xətt hakimi bayrağını havaya qaldıraraq Mbodjun ofsaytda olduğunu bildirmiş və qol hesaba alınmamışdı. 

Videodan da göründüyü kimi, epizodlar oxşar olsa da, qərarlar fərqlidir. Halbuki Renato ilə müqayisədə Mbodj daha çox cinahda idi və birbaşa topun qarşısını kəsmirdi.

Belədə ortaya sual çıxır: necə olur, 5 il əvvəl “Neftçi” bu epizodda qol vurarkən hesaba alınmır, lakin eyni hal “Neftçi”nin qapısında yaşanarkən hakimlər qolu qeydə alırlar? Başa düşürük, 5 il əvvəl VAR yox idi, bəs indi? Görünən odur ki, “Neftçi” üçün VAR 5 il əvvəl də yox idi, elə indi də yoxdur...