İnqilab Məmmədov: 1 səhv 4 düzü apardı...

Elm və təhsil naziri Emin Əmrullayev sosial şəbəkə hesabında etdiyi paylaşımda Müşahidə Şurasının üzvü olduğu “Neftçi”yə dəstəyini nümayiş etdirib. O, “ağ-qaralar”ın loqosunu paylaşıb. Bununla da Əmrullayev dolayısı ilə ötən gün qələbəsini əlindən alınan “Neftçi”nin sahibsiz olmadığını nümayiş etdirib. Həmin paylaşıma “Neftçi” azarkeşlərindən biri maraqlı şərh yazıb: “Emin müəllim, İnqilabı yenidən tədris etmək lazımdır. Əvvəlki bilik və elmdə şübhələr var. Yenidən imtahana çəkmək lazımdır”.

Mənim kimi, 2000-lərin əvvəlində qəbul imtahanı verən şagirdlərə müəllimlər dönə-dönə bu cümləni təkrar edirdilər: “4 səhv 1 düzü aparır”.

Bütün bunları fikirləşə-fikirləşə bir anlıq göz önündə dünənki hakim biabırçılığı canlanır. Gör İnqilab Məmmədovun 1 səhvi nələrə gətirib çıxardı:

1) “Neftçi” iki vacib xal itirdi. Hansı ki, bəlkə də mövsümün sonunda bu iki xal komandanı avrokuboklardan kənarda qoyacaq;

2) Həmin qol hesaba alınmasaydı, Junior Martins növbəti dəfə tərbiyəsizlik etməz, qalmaqal yaşanmazdı;

3) Həmin qalmaqal yaşanmasaydı, Breno Almeyda qırmızı vərəqə görməzdi;

4) Yuri Vernidub özündən çıxmaz, meydandan uzaqlaşdırılmazdı...

Əslində, bu siyahını çox uzatmaq olar. Lakin hakimlərin bəxti gətirib ki, 4 səhv 1 düzü aparır, 14 yox...

Dünən Zirədə yaşananlar növbəti dəfə Azərbaycan hakimliyinin necə rəzil durumda olduğunu göstərdi. Halbuki “Turan Tovuz” - “Zirə” oyununda yaşanan biabırçılığın heç qırxı da çıxmayıb. Bütün bu səhvlər AFFA rəhbərliyinin hakimliyin inkişafı haqqında danışdıqlarının nağıl olduğunu göstərir.

Əslində, bütün bunlar səhv ola bilməz. Təbii ki, əlimizdə fakt olmadığı üçün kimisə ittiham edə bilmərik. Lakin kor-kor, gör-gör. 27 oyundan 6-7-də bir komandanın əleyhinə bu qədər hakim səhvi təsadüf ola bilər? Kimsə çıxıb bunun izahını verə bilər?

Dünəndən istər sosial şəbəkələrdə, istərsə mediada “Zirə”nin qolu xeyli müzakirələrə yol açıb. “Neftçi”dən nə vaxtsa nəyəsə görə incik qalan 2-3 nəfəri çıxmaqla, hamının fikri birmənalıdır: hakimlər dünən “Neftçi”nin qələbəsini əlindən aldılar! Hakimlər Komitəsinin sədri Rəhim Həsənovun bu epizoda necə şərh verəcəyi də maraqla gözlənilir. Lakin Həsənovun nə deməsinin zərrə qədər də önəmi yoxdur. Birincisi, sabiq FİFA referisi özü karyerası ərzində N qədər buna bənzər səhvlərə yol verib. İkincisi, guya bugünə qədər Həsənovun verdiyi şərhlər hamısı düz olub? Özlərinə necə sərf edib, əksər hallarda da elə şərh veriblər. Üçüncüsü, lap tutaq ki, Rəhim Həsənov çıxıb dedi ki, bəli, hakim səhv edib. Bununla nəsə dəyişəcək? Belədə “Neftçi”nin iki xalı qaytarılacaq? Yoxsa Breno Almeydaya, yaxud Yuri Verniduba verilən qırmızı vərəqələr ləğv ediləcək?

Yeri gəlmişkən, İnqilab Məmmədovun Brenoya birbaşa qırmızı vərəqə göstərməsi də yanlışdır. Futbolçu meydana daxil olubsa, ona sarı vərəqə göstərilib. Bəli, Almeydanın buna qədər sarı vərəqəsi var idi. Lakin məsələ ondadır ki, belədə braziliyalı futbolçu iki sarı vərəqədən qırmızı almış olacaqdı. Bu isə 1 oyunluq cəza deməkdir. Yəni Almeyda “Neftçi”nin qarşıdakı yalnız bir oyununu kənarda izləyəcəkdi. İndiki halda isə futbolçunun iki oyunluq cəzası yüksəkdir. O ki qaldı Verniduba, ümumiyyətlə, ukraynalının qırmızı vərəqə görməsi də ayrı söhbətin mövzusudur. Ukraynalı mütəxəssis ölkəmizə gəldiyi gündən aqressiv hərətləri ilə gündəmə gəlməyib. Gör indi İnqilab Məmmədov Vernidubu hansı vəziyyətə salıb ki, ukraynalı məcbur qalıb kepkasını yerə çırpır. Sarı vərəqədən sonra Vernidub nə hakimi təhqir etdi, nə başqa qeyri-etik ifadə işlətdi. Sadəcə referidən VAR-a baxmağı istədi. Buna görə qırmızı vərəqə düşürsə, onda gərək hər oyunda ehtiyat oyunçular skamyasından 6-7 nəfər uzaqlaşdırıla.

Bir sözlə, İnqilab Məmmədovun yanlış qərarları “Neftçi”yə təkcə itirilən 2 xalla ziyan vurmadı. “Ağ-qaralar” qarşıdakı “Qarabağ”la matçda da Məmmədovun səhvlərinin əziyyətini çəkəcək. Hazırda əla formada olan, son oyunlarda komandanın ən yaxşılarından hesab edilən Breno Almeyda “Qarabağ”la görüşdə (bəlkə də hər iki görüşdə) “Neftçi”yə kömək etməyəcək. Eləcə də Ağdam klubu ilə matçda Yuri Vürnidub da komandasının yanında olmayacaq. Gör bir hakim səhvi nələrə gətirib çıxardı...

İBRAHİM