AFFA millimizin məğlubiyyətlərini niyə gizlədir?

Azərbaycanın qadınlardan ibarət U-17 millisi Avropa çempionatının seçmə mərhələsində ilk iki oyununda fiaskoya uğrayıb. Martın 12-də qrupdakı ilk matçında Belçikaya biabırçı hesabla uduzan (0:11) yığmamız, dünən də Sloveniya ilə qarşılaşıb. İnsafən, bu dəfə milli komandamız “abırlı hesabla” məğlub olub - 0:3.

2 turdan sonra Azərbaycan yığması qrupda xal qazanmayan yeganə komandadır. Belə ki, Belçika 2 turdan sonra 6 xalla qrup lideridir. Farer adaları və Sloveniyanın isə 3 xalı var. Bu komandalardan fərqli olaraq Azərbaycan millisi xala həsrətdir. Qrupdan sonuncu olan yığmamız son matçını martın 18-də Farer adalarına qarşı keçirəcək.

Azərbaycan millisinin seçmə mərhələdə fiaskoya uğraması gözlənilən idi. Gözlənilməz olan isə AFFA-nın bu yenilgiləri gizlətməyə çalışmasıdır. Belə ki, martın 12-də assosiasiyanın rəsmi saytında “Bu gün saat 15:00. Belçika (U-17, Qadınlar) - Azərbaycan (U-17, Qadınlar)” başlıqlı xəbər yer alıb. Bu gün isə artıq martın 16-dır. Lakin AFFA-nın saytında nə Belçika ilə oyunun, nə də dünənki Sloveniya matçının nəticələri yer alıb. Belçika ilə oyundan əvvəl komandanın məşqindən fotoreportaj veriblər, Belçika ilə matçın anonsunu veriblər, amma nəticəni yox...

Bu barədə AFFA-nın sosial şəbəkə hesablarında da hər hansı məlumat paylaşılmayıb. Görünür, nəticələrdən utanan assosiasiya rəsmiləri çıxış yolunu hesabları “gizlətməkdə” görürlər. Sanki 90-cı illərdəyik, internetimiz yoxdur, heç kim də bu nəticələrdən xəbər tutmayacaq. İnkişaf strategiyası bu olsa gərək...