Marko Yankoviç: “Hədəfimiz hər iki titulu qazanmaqdır”

“Qarabağ”ın yarımmüdafiəçisi Marko Yankoviçin Futbolxeber.az saytına müsahibəsi

- Azərbaycan kubokunda 1/4 final mərhələsinin cavab oyununda "Şamaxı"nı 3:1 hesabı ilə məğlub etməklə yarımfinala yüksəldiniz. Qələbəni necə şərh edərdiniz?

- Yaxşı matç alındı. Erkən hesabı açsaq da, müdafiə xəttində buraxdığımız boşluqlar rəqibin hesabı bərabərləşdirməsi ilə nəticələndi. İkinci hissədə toparlandıq. Özümüzdə güc taparaq yaxşı oyun ortaya qoyduq. Qollar vuraraq layiq olduğumuzu qələbəyə çatdıq. Komandamı təbrik etmək istəyirəm. Əla iş gördük.

- İlk qolu vursanız da, “Şamaxı” hesabı tez bərabərləşdirdi. Bu amil komandanız üzərində əlavə təzyiq yaratmadı?

- Çox da yox. Futbolda belə hallar tez-tez olur. Belə epizodlar komanda şəklində inkişafa aparır. Biz boşluqlarımızı görmüş oluruq. Qarşıda daha yaxşı hazırlaşıb belə qollar buraxmamalıyıq.

- Bəs penalti epizodunda nə hisslər keçirdiniz? Matçın əlavə vaxta getmək ehtimalını göz önünə aldınız?

- Reallıq odur ki, rəqib fərqlənə bilmədi və matç 90 dəqiqə ərzində başa çatdı. Əks hal baş versəydi, bizi qarşıda 30 dəqiqə gözləyəcəkdi. Bu olsaydı belə, əlavə vaxtda mütləq qələbə üçün oynayacaqdıq.

- Yarımfinalda hansı rəqiblə qarşılaşmaq istərdiniz: “Sabah”, yoxsa “Qəbələ”?

- Bunu cavab matçından sonra daha dəqiq biləcəyik. Kubokda hər bir rəqib çətindir. Çünki kubok bütün komandalar üçün olduqca önəmli bir turnirdir. Hər kəs kuboku qazanmaq istəyir. Lakin indi diqqətimizi qarşıdakı çempionat matçına yönəltmişik.

- Hazırkı məqamda liderdən 7 xal geri qalmağınız üzərinizdə gərginlik yaratmır?

- Xeyr. Başa düşürük ki, birinci yerə yüksəlmək üçün xallara ehtiyacımız var. Yalnız buna köklənmişik. İnanırıq ki, istəyimizə çatacağıq.  

- "Qarabağ" iki cəbhədə mübarizə aparır. Hər iki turnirdə qalib olmağa gücünüz çata bilər?

- Əlbəttə. Bizim hədəfimiz hər iki titulu qazanmaqdır. Buna heç kimin şübhəsi olmasın.

Azad Nuriyev