“Neftçi”yə sahib çıxmaq zamanı

Turun mərkəzi oyununa 10 min azarkeş toplaşsa da, “Sabah”ın məşqçisi “Qarabağ”lı həmkarına qarşı qeyri-etik jest etsə də, Azərbaycan futbolu qarşısında hər hansı bir ciddi xidməti olmayan Maqsud Adıgözəlov ölkə futbolunu ayaqda saxlayan Qurban Qurbanova söz atsa da, bütün bunlar futbolumuzun gündəmi ola bilmir, ikinci planda qalır. Çünki ölkə futbolunun gündəmi “Neftçi”dir. Əksəriyyət hakimlərin “Neftçi”yə qarşı qərəzini, AFFA-nın “ağ-qaralar”ı loru dildə desək, “söhbətə çağırmasını” müzakirə edir. Bu, tərəfdən “ağ-qaralar”ın əzəmətini göstərirsə, digər tərəfdən də “Neftçi”nin ölkə futbolu üçün hansı mənanı daşıdığını nə hakimlərin, nə də AFFA-nın dərk etdiyini göstərir. Bəlkə hakimlər dərk edirlər, lakin nələrəsə görə bu gün flaqmana qarşı düşmən kəsiliblər. Assosiasiyanı isə qınamağa dəyməz. Qurumun əksəri futbola təsadüfi gəlmiş adamlardırlarsa, daha nə gözləyəsən...

İstənilən halda əksər mütəxəssislər də təsdiq edirlər ki, “Neftçi” ölkə futbolunun dəyəridir, markasıdır. Azərbaycanda yüzlərlə hakim var, müstəqilliyimiz dövründə AFFA-da yüzlərlə kadr işləyib, işləyir. Amma 5-10 ildən sonra heç biri xatırlanmır. “Neftçi” isə əbədidir. Komandanın böyüklüyünü, əzəmətini dərk edən, “ağ-qaralar”a könül verən yüzminlər, milyonlar var. Və bu gün həmin azarkeşlər “Neftçi”yə sahib çıxmalıdırlar. Komandanın böyüklüyünü növbəti dəfə meydanda futbolçular, tribunada isə azarkeşlər göstərməlidirlər. Həm meydandakı, həm də meydandan kənardakı rəqiblərə.

“Şamaxı” ilə oyundan sonra komandanın baş icraçı direktoru Cenk Sümer müsahibəsində belə bir fikir səsləndirdi: “Təbii ki, baş verənlər bizi üzür. Özü də yüksəlişdə olduğumuz bir dönəmdə. Amma bunlar bizi dayandıra bilməz. Qarşıdakı matçları qalib başa vurmağa davam edəcəyik. Biz özümüz-özümüzlə hesablaşırıq”. “Bunlar bizi dayandıra bilməz” fikri həm də azarkeşlərə bir mesajdır. “Neftçi” bütün bu təzyiqlərin öhdəsindən azarkeşləri ilə birgə gəlməlidir.

Qalmaqallı “Şamaxı” matçından sonra “Neftçi” növbəti oyununu martın 9-da keçirəcək, özü də öz meydanında, “Turan Tovuz”a qarşı. “Palms Sports Arena”dakı görüş 20:30-da start götürəcək. Qeyri-iş günü, vaxt münasib, rəqib də iddialı. Azarkeşi stadiona daha nə cəlb etməlidir? Yuri Vernidubun gəlişindən sonra “Neftçi”nin dirçəlişi göz önündədir. Son turlar ardıcıl qələbələr qazanan “ağ-qaralar” hamının hesabdan sildiyi kollektivdən avrokubok uğrunda mübarizə aparan komandaya çevrilib. Azarkeş də bunun qarşılığını stadiona gəlməklə verməlidir. Hamı bir daha “Neftçi” tribunasının əzəmətini görməlidir. Bunun üçün klub rəhbərliyi də jest edərək “Turan Tovuz”la oyunların qiymətinə böyük endirim edib. Əksər tribunalara qiymət bir manatdır. İndi bircə qalır azarkeşin bir daha “Neftçi”nin əzəmətini komandanı sevənlərə də, sevməyənlərə də, düşmən kəsilənlərə də göstərməsi. Necə deyərlər, qoy “Neftçi”ni sevməyənlər, komandanın dirçəlməyini istəməyənlər kimə qənim kəsildiklərini görsünlər, çəkinsinlər. “Palms Sports Arena”ya 5 min, 7 min azarkeş toplaşsa, hansı hakimin “Neftçi”yə qənim kəsilməyə cəsarəti çatar? Odur ki, “Turan Tovuz”la matç “Neftçi” azarkeşi üçün sosial şəbəkələrdə göstərdiyi fəallığı tribunada nümayiş etdirmək zamanıdır. Avropaya gedən yolda azarkeşi yanında olan “Neftçi”ni heç kim dayandıra bilməz.

İBRAHİM