Yuri Vernidubdan qələbə şərhi

“Neftçi” azarkeşlərini qələbə münasibəti ilə təbrik edirəm. Ötən həftə "Forza Neftçi"nin doğum günü idi. Həmin vaxtı xəstələnmişdim və orada iştirak edə bilmədim. Ona görə də fanatlardan üzr istəyirəm. Onlar daim bizə dəstək verir və biz də belə nəticələr əldə edirik”.

Futbolxeber.az saytının məlumatına görə, bu sözləri “Neftçi”nin baş məşqçisi Yuri Vernidub Azərbaycan Premyer Liqasının XX turunda “Kəpəz”i 3:1 hesabı ilə məğlub etdikləri oyundan sonra deyib.

O, hücum xəttindən razılığını ifadə edib: “Sambu və Vensan Abubakara gəldikdə, hər ikisi yaxşı forvarddır. Fərqli planlarda oynayırlar. Məşqçi kimi mənə seçim etmək çətindir. Amma həm Sambunun, həm də Abubakarın oyunundan razıyam. Onların qol vurması mənə xoşdur. Amma gördüyüm odur ki, özlərini də çox dəyişiblər. Öz üzərilərində daha çox işləyib, daha çox komanda üçün oynayırlar. Belə davam etsələr, daha yaxşı oynayacaqlar”.

“Ağ-qaralar”ın baş məşqçisi jurnalistlərin suallarını da cavablandırıb.

- İki həftəlik fasilə sizi necə qayğılandırır və vəziyyətdən necə çıxmağı düşünürsünüz?

- Bu oyundan sonra istirahət olacaq. Qarşıdakı həftə oyunumuz yoxdur. Rəhbərlikdən xahiş etmişəm ki, yoxlama görüşü keçirək. Olmasa, öz aramızda oynayacağıq. Bunu komandanı tonusda saxlamaq üçün edirik.

- Bu cür qələbədən sonra futbolçulara mükafat verilir? Nə qədər olur?

- Onlar üçün ən böyük mükafat qələbədir. Bu gün işlədik və üç xalı qazandıq. Onlarla çox ünsiyyətdə oluram. Münasibətləri də çox yaxşıdır. Daha çox işləyəcəyik və hər şey daha da yaxşı olacaq.

- Komandanın optimal heyəti yoxdur, bütün futbolçuların xidmətindən istifadə edirsiniz. Optimal heyəti formalaşdırmamısız, yoxsa bu, “Neftçi”nin oyun prinsipindən irəli gəlir?

- Qapıçıları nəzərə almasaq, komandamızda 23 futbolçu var. Onların hər biri məşqlərdə çox yaxşı təsir göstərir. Təbii ki, hamısı eyni anda meydana çıxa bilməz. Onlar oynamağa layiqdilər. Buna görə şərait yaradıram ki, oyunlarda oynasınlar. Əgər oyunçular ancaq məşq edir, oynamırlarsa, fərqli nəticələr ortaya çıxır. “Qarabağ”ın oyunlarında gördüz ki, bəzi hallarda dəyişikliklərə getdilər və hansı nəticələr oldu. Bir futbolçu uzun müddət meydana çıxmırsa, oyun ritmini itirir. Ona görə də hər zaman heyəti qarışdırırıq ki, hamı bir-birini əvəz edə bilsin. Bizim komandada ulduz yoxdur, bizdə ailə və komanda var. Komandada ulduz olanda onları idarə etmək də çətindir. Bizim yanaşma fəlsəfəmiz budur.

- “Qarabağ”la oyununun təxirə salınmasına münasibətiniz necədir? Matçın təxirə salınması “Neftçi”yə necə təsir edə bilər?

- Bu mövzunu bağlamaq vaxtıdır. Rəhbərliklə görüşdük və belə çətin dönəmdə “Qarabağ”a dəstək olmaq qərarı verdik. Hansı ki, onlar Azərbaycanı böyük futbol arenasında təmsil edir. Belə qərar verdik, bizim qərardır. Bizim üçün o qədər də yaxşı olmaya bilər, ritmdən düşə bilərik. Amma ümidvaram ki, hər şey yaxşı olacaq. “Qarabağ”a “Nyukasl”la oyunda qələbə arzulayıram. Bu, bütün Azərbaycanın xeyrinədir. Sizin ölkə buna layiqdir.

- Altıncı oyundur ki, uduzmursunuz. Azarkeşlərə yaxın gələcəklə bağlı nə deyə bilərsiz?

- Azarkeşsiz futbol olmur. Yaxşı münasibətlərimiz davam edir. Onlardan istəyərdim ki, daim yanımızda olsunlar. Həm belə xoş günlərimizdə, həm də o qədər də xoş olmayan durumumuzda da. Bu, həm “Neftçi”yə, həm də azarkeşlərimizə lazımdır. Mən bizim azarkeşlərilə fəxr edirəm və çox sevinirəm ki, “Neftçi”nin böyük azarkeş ordusu var.