Sülhlə bağlı hər şeyə sevinmək lazımdır

Noyabrın 5-də futbolla bu və ya digər şəkildə maraqlanan, bu idman növünə  bağlılığı olan hər kəsin diqqəti ABŞ-yə, Con Kennedi adına İncəsənət Mərkəzində keçirilən Dünya Kubokunun püşkatma mərasiminə yönəlmişdi. Azərbaycan millisi 2026-cı ildə keçiriləcək mundiala vəsiqə qazanmasa da, bu tədbir ölkəmiz üçün də əlamətdar oldu.

Mundialın püşkatma mərasimindən öncə ABŞ prezidenti Donald Trampa FIFA tərəfindən Sülh Mükafatı təqdim olundu. Həmin mükafat isə Azərbaycanın tanınmış Xalq rəssamları – Səlhab Məmmədov və Əli İbadullayev tərəfindən hazırlanıb. "Düşüncələr və Arzular" adlı heykəlcik mərasimin xüsusi məqamı idi. Azərbaycanın dünya incəsənətinə verdiyi töhfə ilin ən diqqətəlayiq beynəlxalq tədbirlərindən birinin mərkəzində idi.

İlk FIFA Sülh Mükafatının simvolu olaraq Səlhab Məmmədov və Əli İbadullayevin heykəlinin seçilməsi, Azərbaycan incəsənətinin beynəlxalq səhnədə artan nüfuzunun və ölkə rəssamlarının qlobal mövzuları universal vizual dildə həll etmək qabiliyyətinin açıq bir əlaməti idi. Bir sözlə, FIFA tərəfindən ABŞ prezidentinə verilən mükafatın məhz azərbaycanlı rəssamlar tərəfindən hazırlanması böyük hadisədir.

Lakin təəssüf ki, tədbirdən dərhal sonra Azərbaycan adına bu uğura sevinməyənlər, ağız büzənlər də tapıldı. Səbəb əndrabadidir: Səlhab Məmmədov AFFA-nın sabiq baş katibi və icraçı vitse-prezidenti, hazırda FİFA-nın Avropa Milli Assosiasiyaları Departamentinin direktoru vəzifəsini tutan Elxan Məmmədovun atasıdır. Elxan Məmmədovu bəyənməyənlər, onun fəaliyyətinə ağız büzənlər indi Trampa azərbaycanlı rəssamların hazırladıqları mükafatın təqdim edilməsinə neqativ yanaşırlar. Əvvəla, futbol üzrə Dünya Kubokunun püşkatma mərasimi kimi nəhəng bir tədbirdə Azərbaycanla bağlı müsbət nəsə varsa, buna ancaq sevinmək lazımdır. FİFA-da, ABŞ-də, ümumiyyətlə dünyanın istənilən ölkəsində, istənilən media orqanında heç kim “Trampa Elxan Məmmədovun atasının hazırladığı mükafat təqdim olundu” demir. “Trampa azərbaycanlı rəssamların hazırladığı mükafat təqdim edildi” deyilir. Həm də bu, bir tərəfdən Azərbaycana, ölkəmizin incəsənətinə verilən dəyərdirsə, digər tərəfdən də Elxan Məmmədovun FİFA kimi ali qurumda nüfuzunun göstəricisidir. Bəyənsəniz də, bəyənməsəniz də, Elxan Məmmədovun beynəlxalq futbol qurumunda nüfuzu böyükdür. Buna qədər Bakıda keçirilən COP29-da, Misirdə təşkil olunan Yaxın Şərq Sülh Sammitində, eləcə də digər nüfuzlu tədbirlər zamanı İnfantinonu məhz Məmmədovun müşayiət etməsi ona olan etimadın göstəricisidir.

Ölkəmizin istənilən fərdinin beynəlxalq səviyyədə əldə etdiyi hər hansı uğura şəxsi ədavət prinsiplərinə əsaslanmaqla ağız büzmək, belə münasibətə daha uyğun gələn şəkildə ifadə etsək, primitiv davranış sərgiləmək kimliyindən asılı olmayaraq, həmin şəxs(lər)in ictimai şüurunun tam olaraq formalaşmamasına əyani nümunədir.

Sevinə bilək. Bu, əlahiddə bacarıq deyil, amma çox faydalıdır. Xüsusilə, sülhlə bağlı məsələdə. Müzakirə predmeti mükafat olsa belə...

İbrahim Cəfərov