"Simurq" Antalyadakı ilk oyunundan qalib ayrıldı

Antalyada qış təlim-məşq toplanışında olan “Simurq” ilk yoldaşlıq görüşün keçirib. Futbolxeber.az-ın klubun rəsmi saytına istinadən verdiyi məlumata görə, "Simurq"un rəqibi Almaniyanın Qərb Regional Liqasında mübarizə aparan "Velbert" klubu olub. Qarşılaşmaya “Simurq” bu heyətlə çıxıb: Pavel Kapsa, İlkin Qırtımov (k), Dilaver Zrnanoviç, İdan Veitzman, Tural Axundov, Patrik Osiako, Taqim Novruzov, Stepan Polyak, Nicat Qurbanov, Rəşad Eyyubov və Draqan Çeran.

İlk hissədə “Simurq” bir neçə dəfə rəqib qapısı ağzında təhlükəli anlar yaratsa da, qol istəyinə 38-ci dəqiqədə çatıb. Draqan Çeran başla topu tordan keçirməyi bacarıb. Bundan öncə isə almanlar heç nədən “Simurq”un qapısına təyin edilmiş penaltidən yararlana bilməyib. Rəqib futbolçu topu qapıdan aralı vurub. İlk hissə “Simurq”un 1:0 hesablı üstünlüyü ilə başa çatıb.

Fasilədən sonra da "Simurq" oyunda öz üstünlüyünü qoruyub saxlaya bilib. Yeni transfer Murad Səttarlının cinahdan asmasından sonra serbiyalı hücumçu Draqan Çeran növbəti dəfə fərqlənsə də, hakim qolun oyundan kənar vurulduğunu hesab edərək qeydə almayıb. Qarşılaşmanın qalan dəqiqələrində rəqiblərdən heç biri fərqlənə bilməyib. Nəticədə milli komandanın baş məşqçisi Berti Foqtsun da izlədiyi görüş, "Simurq"un qələbəsi ilə başa çatıb.

Antalyada yoldaşlıq görüşlərinə qələbə ilə start Georgi Çixradzenin yetirmələrinin növbəti rəqibi isə yanvarın 19-da Rumıniyanın "Vasluy" klubu olacaq.