İmad Faraj: “Neftçi”yə məhz bunun üçün gəlmişəm”

“Qalib gəldiyimiz üçün çox şadam. Bir qələbəyə ehtiyacımız var idi. Nəhayət ki, istəyimizə çatdıq”.

Futbolxeber.az saytına müsahibəsində bu sözləri “Neftçi”nin üzvü İmad Faraj deyib.

Fransalı futbolçu Azərbaycan Premyer Liqasının V turunda “Sumqayıt” üzərində qazanılan 2:0 hesablı qələbəni belə şərh edib: “Əslində, biz əvvəlki oyunlarda da yaxşı oynamışdıq. Sadəcə qol vura bilmirdik. Nəhayət ki, “Sumqayıt”la matçda uğursuz seriyaya son qoyduq. İnanıram ki, bu qələbənin ardı gələcək”.

İlk qol zamanı məhsuldar ötürmə müəllifi olan Faraj bunu normal hal adlandırıb: “Məhsuldar ötürmə müəllifi olmam normaldır. “Neftçi”yə məhz bunun üçün gəlmişəm. Bu, mənim işimdir. Meydana çıxarkən komandamın qələbəsində pay sahibi olmaq istəyirəm. Fərqi yoxdur qol vurdum, yaxud məhsuldar ötürmə verdim. Növbəti matçlarda da əlimdən gələni edəcəm ki, komandama kömək olum”.

25 yaşlı vinger növbəti turda qarşılaşacaqları “Karvan”la görüşdən də söz açıb: “Hər zaman daha yaxşı olmaq istəyirik. Bunun üçün əlimizdən gələni edəcəyik. Məqsədimiz “Karvan”la matçda da 3 xal qazanmaqdır. Rəqibin iddialı, yaxud autsayder olması fərq etmir. Hədəfimiz qalib gəlməkdir.  Doğma divarlar arasında oynayacağlıq. Mütləq azarkeşlərimizi sevindirməliyik”.

Fərəc Aslanov