Ağadadaş Salyanski: “Bu qələbənin ardını gətirmək lazımdır”

“Neftçi”nin hücumçusu Ağadadaş Salyanskinin Futbolxeber.az saytına müsahibəsi

- Nəhayət ki, “Neftçi” həsrətə son qoydu. “Sumqayıt” üzərində qazanılan 2:0 hesablı qələbəni necə şərh edərdiniz?

- Çox gərgin oyun keçdi. Sumqayıt səfəri həmişə çətin olur. Şükürlər olsun ki, qələbə qazandıq. Nəhayət ki, uğursuz gedişata son qoyduq. İndi bunun ardını gətirmək lazımdır.

- Matçda hesabı açmaqla qələbədə böyük pay sahibi oldunuz. Təəssüratlarınız necədir?

- Sevinirəm. Məşqlərdə daim çalışırıq. Son oyunlarda qol vurmaq üçün çətinlik çəkirdik. Şükürlər olsun ki, bunu aradan qaldıra bildik. Kimin qol vurması önəmli deyil. Əsas olan komandanın uğurudur.  

- Ağadadaş Salyanski özünü görüşün qəhrəmanı sayır?

- Bunu azarkeşlər, siz jurnalistlər deyə bilərsiniz. Önəmli olan bunun ardını gətirməkdir.

- Necə düşünürsünüz, bu qoldan sonra sizi əsas heyətdə görə biləcəyik?

- Heyətlə bağlı qərarı baş məşqçi verir. Necə deyə bilərəm ki, məni oynat? Sağ olsun Samir müəllim şans verdi, mən də istifadə etdim. Çalışacağam ki, gələcək oyunlarda da komandamın uğuru üçün əlimdən gələni edim.  

- Hər halda ilk 5 turda əsas heyətdə yer almamısınız...

- Kimin oynaması fərq etmir. Sambu, Alesio, yaxud mən. Biz bir komandayıq. Qələbə üçün çalışırıq. Əsas olan “Neftçi”nin uğurudur.

- Sumqayıtda qazanılan 3 xal növbəti qələbələr üçün stimul olacaq?

- Əlbəttə. Elə vəziyyətdə idik ki, bir qələbəyə çox ehtiyac duyurduq.

- Növbəti turda “Karvan”la qarşılaşacaqsınız. Azarkeşləri ev oyununda da sevindirmək mümkün olacaq?

- Meydana qələbə üçün çıxacağıq. Evdə oynayarıq. İlk 3 ev matçında qalib gələ bilməmişik. İnanıram ki, bu dəfə azarkeşlərimizi sevindirəcəyik.

- Cari mövsüm “Neftçi” müdafiədən oynayan komandaların arxa xəttini yarmaqda çətinlik çəkir. Bunu nə ilə əlaqələndirirsiniz?

- Komanda şəklində baş məşqçinin tapşırıqlarını icra edirik. Samir müəllim hər rəqibə uyğun tapşırıqları verir. Digər tərəfdən də “Neftçi”nin adına görə hər komanda bizə qarşı çox yaxşı hazırlaşır. Bu da bizə ikiqat motivasiya olur.

Fərəc Aslanov