Yenə “Sabah”, yenə hakim biabırçılığı...

- Masazıra, “Sabah” - “Turan Tovuz” oyununa gedəcəksən?

- Yox.

- Niyə?

- Şəhərin bu başından o başına gedib hakim biabırçılığını görməkdənsə, getməmək daha yaxşıdır...

Bu, dünən həmkarlardan biri ilə aramızda olan dialoqdur. Yox, nə uzaqgörənik, nə də proqnozlarımız tutur. Sadəcə “Sabah”ın oyununda hakim biabırçılığının yaşanacağını proqnozlaşdırmaq üçün “Tarix-i Nadiri” yarıya qədər oxumağa ehtiyac yoxdur.

Ötən tur “Neftçi” ilə matçda yaşananlar yaddan çıxmamış hakimlər yenə Masazır təmsilçisinin qələbəsi üçün əllərindən gələni etdilər. Kor-kor, gör-gör, hər şey aşkardır. Ötən tur İnqilab Məmmədov media sektordan belə aşkar penalti olduğu görünən epizodda VAR-ın müdaxiləsindən sonra “Sabah”ın qapısına penalti təyin etmədi. Bu dəfə də Rəvan Həmzəzadə “Sabah”ın “xilaskarı oldu”. Ötən il olduğu kimi, hakimlər bu dəfə də “Turan Tovuz”un hücumçusu Jonun “Sabah”ın qapısından keçirdiyi qolu hesaba almadılar. Serranonun yerdə qaldığı epizodda “Sabah”ın futbolçusunun kobudluğuna qırmızı vərəqə göstərilməməsi isə sözün bitdiyi yerdir.

Ötən tur “Neftçi”nin baş məşqçisi Samir Abasov “Sabah”la matçdan sonra komandasının lehinə verilməyən penalti ilə bağlı acı həqiqəti söyləmişdi: “Əminliklə deyirəm ki, bizim qapımıza olsaydı, 100 faiz penalti veriləcəkdi”. Bəli, indi də eyni kobudluq “Sabah”a qarşı olsaydı, “Turan Tovuz”un futbolçusu mütləq meydandan qovulacaqdı. Yaxud eyni qolu meydan sahibləri vursaydılar, hakimlər onu hesaba alacaqdılar.

“Sabah” cari mövsüm cəmi 4 oyuna çıxıb. Bunlardan son ikisində hakim biabırçılığı yaşanıb. Bu biabırçılıq nə vaxt başladı? “Sabah” “İmişli”yə uduzandan sonra. Görünən odur ki, hakimlər “Sabah”ın bir daha uduzmağına imkan verməyəcəklər. Bəs bu biabırçılıq nə vaxta kimi davam edəcək? Bax onu ancaq Allah bilir...

Sadəcə “Sabah” rəhbərliyinin qəbul etmək istəmədiyi bir həqiqət var. Ölkə daxilində hakimlərin hesabına nə qədər irəli getsəniz də, Avropaya çıxanda İnqilab, Rəvan, Kamal olmur. Ona görə də gücünüz maksimum Moldova, Latviya klublarına çatır...

İbrahim Cəfərov