Türkiyə klubu “Spartak”ın futbolçusunu transfer edir

Kim Çölstrem Moskva “Spartak”ını tərk edəcək. Futbolxeber.az-ın məlumatına görə, isveçli futbolçu karyerasını Türkiyə Superliqasında davam etdirəcək. O, bu ölkənin “Bursaspor” klubu ilə anlaşıb. Tərəflər 3 illik müqaviləyə imza atacaqlar. Transferə görə “Bursaspor” “Spartak”a 2,5 milyon avro ödəyəcək. Çölstrem qarşıdakı günlərdə “Bursaspor”un düşərgəsinə qoşulacaq.

Qeyd edək ki, Çölstrem karyerası ərzində “Hakken”, “Yurqorden” (hər ikisi İsveç), “Renn”, “Lion” (hər ikisi Fransa) klublarında çıxış etdikdən sonra 2012-ci ildə “Spartak”a transfer olunub. Moskva klubunun heyətində 29 matça çıxan isveçli futbolçu 3 dəfə rəqib qapısına yol tapıb. 2001-ci ildən etibarən İsveç yığmasına dəvət alan təcrübəli yarımmüdafiəçi 13 il ərzində forma geydiyi 108 oyunda 16 qol vurub.