“Araz-Naxçıvan” adına tarix yazdıq”

“Bizi çətin oyunun gözlədiyini bilirdik. “Aris”i Bakıda məğlub etsək də, heyətlərində kifayət qədər keyfiyyətli futbolçuların olması, doğma meydanda güclü azarkeş dəstəyinə sahib olmaları ehtiyatı əldən verməməyə vadar edird”. Matçın gedişində azarkeşlərin fəallığını xüsusi qeyd etmək istərdim”.

Futbolxeber.az saytının məlumatına görə, bu sözləri “Araz-Naxçıvan”ın müdafiəçisi Bəxtiyar Həsənalızadə “Aris”ə qarşı UEFA Konfrans Liqasının ikinci təsnifat mərhələsinin cavab oyunu (2:2) barədə danışarkən deyib.

O, klubun mətbuat xidmətinə açıqlamasında görüşün çox çətin keçdiyini bildirib: “Görüşün əvvəli yaxşı başladı, ardıcıl 2 qol vurduq və hesabdakı üstünlüyümüzü xeyli artırdıq. Bir epizodda diqqətsizlik etməyimiz qırmızı vərəqə almağımıza və meydanda azlıqda qalmağımıza səbəb oldu. Belədə müdafiəyə çəkilməli olduq. Düzdür, hesabı qoruya bilmədik, ancaq lazım olan nəticəni əldə etdik. Komandamız xarakter göstərdi. Bizim üçün nəticə vacib idi. Hər kəs əlindən gələnin maksimumunu etdi və yekunda debütant “Araz-Naxçıvan” avrokuboklarda növbəti mərhələyə yüksəldi”.

Mərkəz müdafiəçisi növbəti rəqib barədə də danışıb: “Klub adına yaxşı bir tarix yazdıq. Növbəti rəqib “Omoniya” olacaq. Bu oyuna yaxşı hazırlaşmalıyıq. Heyətimizdə itkilər olsa da, yaxşı nəticə qazanmaq üçün mübarizəni sona qədər davam etdirəcəyik. Azarkeşlərimizə səslənirəm ki, oyun günü stadiona gəlin, komandamızı sona qədər dəstəkləyin. Sizin dəstəyiniz gücümüzə güc qatır. Biz də üzərimizə düşəni edəcəyi. Qələbə münasibəti ilə futbolsevərlərimizi təbrik edirəm”.