Elmar Baxşıyev: “Bakıdakı oyuna baxsaq, 5:1 hesabı ilə qalib gəlməli idik”

"Yaxşı oyun izlədik. Hər iki komanda layiqli mübarizə apardı. Bizi səfərdə nəyin gözlədiyini bilirdik. Bu gün şanslı tərəf biz olduq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev “Aris”ə qarşı keçirilən UEFA Konfrans Liqasının ikinci təsnifat mərhələsinin cavab oyunundan (2:2) sonra deyib.

Ümumi nəticədə 4:3 hesablı qələbə qazanaraq növbəti mərhələyə yüksələn Naxçıvan klubunun çalışdırıcısı oyunun qırılma nöqtəsinin komandasının lehinə təyin edilən penalti olmadığını bildirib: “Penalti epizoduna gəldikdə, hakimlərin qərarını heç vaxt müzakirə etmək istəməmişəm. Bakıdakı oyunda da bizim xeyrimizə penalti təyin edilməli idi, amma bunu etmədilər. Biz də bunu qabartmadıq. Oyunun qırılma nöqtəsi isə penalti epizodu deyildi”.

O, komandasının meydanda yaxşı işlər gördünüyü söyləyib: “Aris”in oyununu da vurğulamaq lazımdı. Yaxşı, təşkilatlanmış komandadır. Bakıdakı oyunda da geri dönüşü futbolçularım etdi. Hər iki oyunda “Araz-Naxçıvan” meydanda yaxşı işlər gördü. Bu cür mərhələlər iki oyundan ibarətdir. Deyirsiz ki, iki epizodumuz oldu və hər ikisini dəyərləndirdik. Bunlar futbolun elementləridir. Bakıdakı oyuna baxsaq, epizodları hesablasaq, 5:1 hesabı ilə qalib gəlməli idik. Komanda şəklində yaxşı, layiqli mübarizə apardıq. Yolumuza davam edirik”.