AFFA-da dəyişiklik: Departament rəhbərinin müqaviləsi yenilənmədi

AFFA-da növbəti dəyişiklik baş verir.

Futbolxeber.az saytının əldə etdiyi məlumata görə, iki ildir İnformasiya və İctimaiyyətlə Əlaqələr Departamentinə rəhbərlik edən Elnur Məmmədli postunu tərk edir.

AFFA rəhbərliyi iyulun 29-da müqaviləsi başa çatacaq Məmmədli ilə sözləşmənin müddətini artırmayıb. 

Xatırladaq ki, o, 2 il əvvəl iyulun 30-da AFFA-nın İnformasiya və İctimaiyyətlə Əlaqələr Departamentinə rəhbər təyin edilmişdi. 

Artıq Elnur Məmmədlinin əvəzləyicisi də məlumdur. Bu, bir müddət əvvəl AFFA-ya gətirilən Murad Axundovdur. O, avqustun 1-dən fəaliyyətə başlayacaq. 

Xatırladaq ki, vaxtı ilə “Keşlə”də (indiki “Şamaxı”) mətbuat katibi postunu tutan Axundov AFFA-ya baş katib Cahangir Fərəcullayevin istəyi ilə dəvət olunub.