Qara Qarayev: “Aris” bizim üçün arzuolunan rəqib deyil”

UEFA Konfrans Liqasının II mərhələsində “Aris”lə qarşılaşacaq “Araz-Naxçıvan” hazırlığını davam etdirir.

Futbolxeber.az saytının məlumatına görə, iyunun 16-dan məşqlərini bərpa edən komandanın aparıcı üzvü Qara Qarayev klubun mətbuat xidmətinə açıqlama verib. O, həm hazırlıq prosesindən danışıb, həm də Konfrans Liqasındakı rəqibi dəyərləndirib:

“Potensial rəqiblərimizin hamısı güclü komandalar idi. "Aris"də həmçinin. Yunan klubu bizim üçün arzuolunan rəqib deyil. Amma rəqibi seçmirik, püşk müəyyənləşdirir. “Aris” haqqında az da olsa məlumatımız var. Amma tam, hərtərəfli məlumatı bizə məşqçilər heyəti verəcək. Bunun üçün kifayət qədər vaxtımız var. İndi əsas diqqəti öz komandamıza, hazırlığımıza yönəltməliyik. Komandamızın texniki-fiziki tərəflərini tez bir zamanda bərpa etməli, oyun sistemimizə qaytarmalıyıq. Konfrans Liqasının oyunlarının məsuliyyətini başa düşürük, azarkeşlərin, futbol ictimaiyyətinin bizdən nə istədiyini anlayırıq. Yaxşı heyətimiz var. Mövsümlərarsı fasilədə də ötən il bizə uğur qazandıran heyətin özəyi qorundu, yeni transferlərimiz də var və bu işlər davam edir. İntizamla və əzmkarlıqla istənilən rəqibə qarşı mübarizə aparmaq əzmindəyik. Yenə deyirəm, indi əsas diqqətimiz rəqibdə deyil, öz komandamızda olmalıdır. Məşqçilərimiz rəqibi zamanla araşdıracaq, lazımi məlumatları bizə verəcək”.