Aqil Nəbiyev: “Düzgün yoldayıq”

Azərbaycan U-17 millisinin baş məşqçisi Aqil Nəbiyev Gürcüstanla heç-heçə etdikləri yoxlama oyunundan (1:1) danışıb.

Futbolxeber.az saytının məlumatına görə, mütəxəssis AFFA-nın mətbuat xidmətinə açıqlamasında komandasının yaxşı mübarizə apardığını deyib:

“Maraqlı oyun oldu. Matça yaxşı hazırlaşmışdıq, rəqibi düzgün təhlil etmişdik. Qol imkanlarımız olsa da, yararlana bilmədik. Gürcüstan yığması heç-heçəyə görə sevinirsə, deməli, düzgün yoldayıq. Həm Qazaxıstan, həm də Gürcüstanla matçda yaxşı mübarizə apardıq. Komandamızın böyük potensialı var. Gösərdikləri xarakterə görə uşaqları təbrik etdim. Onların inkişafı üçün daha çox toplanışlar olmalıdır. Bu kollektivlə böyük işlər görə biləcəyimizə inanıram. Müəyyən zaman lazımdır”.

Qeyd edək ki, U-17 millimiz toplanış çərçivəsində Qazaxıstan yığmasına 2:0 hesabı ilə qalib gəlib, Gürcüstan seçməsi ilə 1:1 hesablı heç-heçə edib.