Şahin Diniyev: “6 və ya 8 transfer reallaşdıracağıq”

“Transfer çalışmalarımızı intensiv olaraq davam etdiririk. Lakin hələlik heç bir futbolçu ilə rəsmi razılığa gəlməmişik. Bu səbəbdən də indidən maraq dairəmizdə olan futbolçuların adlarını açıqlamağım düzgün olmaz”. Futbolxeber.az saytına verdiyi açıqlamada bu sözləri “Rəvan”ın baş məşqçisi Şahin Diniyev deyib.

Təcrübəli mütəxəssis ad açıqlamasa da, heyətə qatacağı yeni futbolçuların sayını gizlətməyib: “Komandamızın hər mövqeyi güclənməlidir. Həm yerli, həm də əcnəbi futbolçularla danışıqlar aparırıq. Çalışırıq ki, bütün transferlərimizi yanvarın 5-nə kimi yekunlaşdıraq. 100 də olmasa, 80 faiz işlərimizi təlim-məşq prosesinə kimi başa çatdırmalıyıq. Antalyada seleksiya işləri ilə məşğul olmaq istəmirik. Qış transfer pəncərəsi zamanı 6 və ya 8 futbolçunu heyətimizə qatacağıq”.