Qurban Qurbanov: “İstərdik ki, finalda gözəl oyunla yaxşı nəticə qazanaq”

"Hamı üçün çox vacib oyundur. Ən azından final görüşləri elədir ki, bütün klubların azarkeşləri bir yerə toplanır. Bayram kimi olur. Bizim azarkeşlər bizə azarkeşlik edəcək. Neytral azarkeşlər yaxşı futbola baxmağa gələcəklər".

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov Azərbaycan kubokunun finalıda "Sabah"a qarşı keçirəcəkləri matç barədə danışarkən deyib.

O, görüşdən əvvəl təşkil olunan mətbuat konfransında yaxşı oyun və nəticə göstərməyə çalışacaqlarını deyib: "Komanda olaraq çalışacağıq ki, ən azından yaxşı oyun göstərəcək. Kubok da əlavə prestijdir. Çempion olmuşuq, amma istərdik ki, finalda gözəl oyunla yaxşı nəticə qazanaq".

Təcrübəli mütəxəssis həlledici matçın Sumqayıtda - Mehdi Hüseynzadə adına Sumqayıt Şəhər Stadionunda keçirilməsinə də toxunub: "Sumqayıtda meydança yaxşıdır. Orada futbola böyük maraq olur. Bizim oyunlarımızda həmişə stadion dolub. 7-8 min azarkeşi görürük. Futbolçular üçün də orada oynamaq xoş olacaq".

Q.Qurbanov sonda "Penaltilərə hazırlaşmısınız" sualını cavablandırıb: "Çox da ciddi yox. Hər bir halda, özləri bilmədən də şərait yaradırıq ki, hər futbolçu 1-2 penalti yerinə yetirsin".