Qurban Qurbanov: “Millimizin qələbəsi fantastik idi”

“Çox gözəl atmosfer var idi. Bu onu göstərir ki, bizdə futbola maraq var. Sadəcə azarkeşləri bir qədər aktivləşdirmək lazımdır. Öz oyunlarımızla, öz işlərimizlə onları stadionlara cəlb etməliyik”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov minifutbol üzrə dünya çempionatında millimizin Rumıniya üzərində qələbəsini şərh edərkən deyib.

O, yığmamızın oyunundan həzz aldığını bildirib: “Millimizin qələbəsi fantastik idi. Əsl finala layiq matç oldu. Son dünya çempionlarını məğlub etdik. Bu qələbədən həzz aldım”.

Qurbanov millimizin dünya çempionu olmaq şansını belə dəyərləndirib: “Hamımız bunu arzu edirik. Amma bu idmandır və istənilən nəticə qeydə alına bilər. Artıq ikinci matçdır canlı izləyirəm. Həyəcan hiss olunur. İlk dəfədir Bakıda bu cür turnir keçirilir. Orxan Məmmədova təşəkkür edirəm. Təşkilatçılıq, maraq çox böyükdür”.

Kubokun finalına hazırlığın normal keçdiyini bildirən Q.Qurbanov qarşıdakı yoxlama oyunlarında milli komandamıza uğurlar arzulayıb.

Təcrübəli mütəxəssis “stadionlarda niyə bu qədər azarkeş görmürük?” sualını belə cavablandırıb: “Bizim oyunlarımızda var (gülür). Çempionatda bir qədər zəifdir. İnşallah, o da olar. 4-5 min azarkeşi bura yığmaq olursa, stadiona da cəlb etmək mümkündür”. 

Fərəc Aslanov