Bəhlul Mustafazadə: “Çox istərdim ki, “İmişli” ev oyunlarını doğma stadionda keçirsin”

“Şamaxı” çox yaxşı müdafiə olunurdu. Meydan amilinin də bir qədər təsiri oldu. Bununla belə, sona qədər mübarizə apardıq. Yekunda da istədiyimiz qolu vurub qalib gəldik. Mövsümü qələbə ilə başa vurduğumuz üçün sevinirik”.

Futbolxeber.az saytına müsahibəsində bu sözləri “Qarabağ”ın müdafiəçisi Bəhlul Mustafazadə mövsümün son turunda “Şamaxı”ya 1:0 hesabı ilə qalib gəldikləri oyun barədə danışarkən deyib.

“İkinci hissədə kapitanlıq sarğısını taxmağınız Qurban Qurbanovla aranızda hər hansı bir problem olmadığını göstərir?” sualına təcrübəli müdafiəçi belə cavab verib: “Əlbəttə, aramızda heç bir problem yoxdur. Kapitan olmağım da birinci dəfə deyil, Zubir meydandan çıxanda əksər hallarda sarğını mən taxmışam”.

B.Mustafazadə qeyd edib ki, daha əvvəl çempionluğu təxmin etmələrinə baxmayaraq, son turlar meydana motivasiya ilə çıxıblar: “Kubokda finala çıxmasaydıq, son turlarda motivasiyamız olmazdı. Lakin bizi “Sabah”a qarşı həlledici oyun gözləyir. Ona görə son turlar əlimizdən gələni etdik ki, maksimum dərəcədə formamızı qoruyaq”.

Kubokun finalı barədə danışarkən o bildirib ki, rəqib güclü olsa da, məqsəd yalnız kuboku qazanmaqdır.

“Qarabağ”ın müdafiəçisi yekunlaşan mövsümü komandası üçün belə dəyərləndirib: “Çempionatda uğurlu çıxış etdik. Təəssüf ki, eyni sözləri Avroliqada barədə deyə bilmirik. Bununla belə, bizim üçün yaxşı təcrübə oldu. Növbəti mövsüm səhvlərimizi aradan qaldırmağa çalışacağıq”.

O, yeni mövsümün maraqlı keçəcəyini düşünür: “Komanda sayının artması çempionatımıza müsbət təsir göstərəcək”.

Əslən İmişlidən olan Bəhlul Mustafazadə eyniadlı komandanın Premyer Liqaya yüksəlməsinə sevinir: “Həm “İmişli”nin, həm də “Qəbələ”nin Premyer Liqaya yüksəlməsinə görə çox şadam. Hər ikisi mənə doğma olan klublardır. Çox istərdim ki, “İmişli” ev oyunların doğma stadionda keçirsin. Belə olarsa, İmişli camaatı komandaya çox yaxşı dəstək verəcək. Digər tərəfdən, mən özüm də orada meydana çıxmaq istərdim”.

Fərəc Aslanov